أكرم حسني: أبو حفيظة وش السعد عليا.. وفيلم العميل صفر نجح بعدل ربنا
تحدث الفنان أكرم حسني، عن بداياته الفنية والإعلامية من خلال برنامج أبو حفيظة، بجانب تعليقه عن نجاح آخر أعماله السينمائية العمل صفر، وحديثه عن مسلسل رجالة البيت الذي تعاون فيه مع الفنان أحمد فهمي، والذي عُرض في موسم رمضان 2020.
وقال أكرم حسني خلال حواره مع الإعلامي معتز الدمرداش، في برنامج ضيفي: سيد أبو حفيظة ده وش الخير والسعد، وسبب حاجات كتير أوي ربنا كرمني بيها.
أما عن نجاح فيلمه العميل صفر، فعلق أكرم حسني قائلًا: بحمد ربنا إن ربنا مبيضيعش التعب، العميل صفر من الحاجات اللي قعدنا فترة كبيرة نحضر لها، وفي الأخر ربنا بيكلل كل ده أن الجمهور بيقول الفيلم حلو وشباك التذاكر بيقول كلام كويس، الحمد لله شعور الرضا والانبساط والتقدير لعدل وعظمة ربنا.
وأضاف: أنا بعيش لحظات استثنائية، وكل زملائي الفنانيين أساتذة كبار وعملوا مجهود كبير وأعمال حلوة جدا وفكرة المنافسة مين إيراداته أكبر من مين والله عمرها ما شغلتني، كل اللي بيشغلني إني أعمل فيلم حلو، واعتقد أن زملائي بيعملوا كده وده في الآخر بيصب في مصلحة الجمهور.
كما كشف أكرم حسني سر اسم شخصيته في فيلم العميل صفر، قائلا: اسم شخصية صفر في فيلم العميل صفر له مبرر في الدراما، لأن الشخصية كان اسمها صقر وفي السجل المدني نسيوا النقطة وبقى اسمه صفر، وده انعكس على شخصيته في الفيلم، يعني هو مش مجرد اسم فيه إفيه لأ ده بيخدم في الدراما.
أكرم حسني: راجعنا أخطائنا في مسلسل رجالة البيت
وتطرق الفنان أكرم حسني، للحديث عن مسلسل رجالة البيت، قائلًا: مسلسل رجالة البيت بيومي فؤاد طلع واعتذر للجمهور عنه لأن كان في هجوم على العمل، ووقتها كنا لسه بنصور المسلسل وبدأت ردود الأفعال تتباين أن بيومي طلع واعتذر يبقى المسلسل مش حلو.
وأكمل: تعرضنا لموجة من الهجوم فيه منها الحقيقي والموضوعي، واللي راجعنا نفسنا فيه لأننا أكيد كنا مُقصرين بشكل أو بـ آخر، وفي منها الليل كان هجوم بتاع الموجة أن ده مش حلو فالناس تدخل تقول ده مش حلو.
