علي جمعة: عيش حياة النبي ﷺ ومنهجه مش تعيش زمنه ودا الفارق بينا وبين الإرهابيين اللي بيفسدوا في الأرض
تحدث الدكتور علي جمعة مفتي الجمهورية السابق وعضو هيئة كبار العلماء بالأزهر الشريف عن كيفية اتباع أخلاق النبي محمد صلى الله عليه وسلم، تزامنًا مع اقتراب المولد النبوي الشريف.
علي جمعة: عيش حياة النبي ومنهجه مش تعيش زمنه ودا الفارق بينا وبين الإرهابيين اللي بيفسدوا في الأرض
وقال علي جمعة مفتي الجمهورية السابق وعضو هيئة كبار العلماء بالأزهر الشريف: هناك درجات للعلاقة بيننا وبين سيدنا النبي، وهي أن نفهمه، ثم بعد الفهم أن تصدق، وبعد ذلك اتباعه، ثم عيش النبي صلى الله عليه وسلم، يعني خليك أسوة حسنة، وعشان تعيشه يبقى محتاج تفهم الصفات بتاعته، علشان تتلبس بها وتتشبع بها، عشان تكون دايب دوبان زي السكر في الشاي مع الرسول، عيش حياة النبي وعيش منهج النبي، مش تعيش زمنه ودا الفارق بينا وبين الإرهابيين اللي بيفسدوا في الأرض دول اللي عاوزين يعيشوا زمن النبي، عاوزين يرجعوا عقارب الساعة لورا، ومش هترجع، مينفعش تجيب المستحيل وترجع الماضي.
وأضاف جمعة خلال تصريحات تليفزيونية: صفات النبي عشان نتتبعها نلاقيها في ترقي دائم، فالمنحنى بيطلع، فالنبي صادق ومؤتمن، وأمين، وجميل في نفسه، نسمة ووردة، كالزهر في طرف، والبدر في شرف، والبحر في كرم، مضيفا: وصفه دا قبل النبوة، بجانب الشهامة وهدوء النفس، والشعور بالأمان عندنا تجلس معه، بعد كدا يروح يتعبد الليالي ذوات العدد في غار حراء، يعني 7 أو 8 أيام حسب الأكل اللي معاه ويرجع تاني، وهذا تأملا وتدبرا وذكرا وصلاة، يعني هم كانوا بيصلوا أيوة بيصلوا على ما كان عليه إبراهيم، إذا هو صاحب همة، مش كسول ولا بيضيع الأوقات، والشافعي يقول صاحبت الصوفية فتعلمت منهم، أن الوقت كالسيف إن لم تقطعه قطعك
وتابع علي جمعة: النبي صلى الله عليه وسلم كان يبذل جهد، وكان صاحب همة، ودي صفة مهمة ما دام عاوز تعيش النبي خليك صاحب همة، ودا ممكن، أه ممكن: قل إنما أنا بشر مثلكم، أنا أنام وانتو بتناموا، أنا أصاب بالمرض والحمى، واحنا بنصاب بالمرض، لكن الفرق بيننا وبينه\: قُلْ إِنَّمَآ أَنَا۠ بَشَرٌ مِّثْلُكُمْ يُوحَىٰٓ إِلَىَّ أَنَّمَآ إِلَٰهُكُمْ إِلَٰهٌ وَٰحِدٌ ۖ، مش بشر مثلنا يعني واحد من الناس، دا مكرم ومعظم دا مبجل.
