شيرين عادل: سبب النجاح المستمر لأعمالي القديمة هو نوعية المواضيع.. ولازم أواكب العصر وأحداثه| خاص

أعربت المخرجة شيرين عادل، عن سعادتها باستمرار الجمهور في مشاهدة أعمالها القديمة، التي مر على إنتاجها العديد من الأعوام، مثل مسلسل العار ودلع بنات، كما كشفت سبب النجاح الدائم لتلك الأعمال حتى يومنا هذا.

وقالت شيرين عادل خلال تصريحات لـ القاهرة 24: بتبسط جدا لما بشوف أعمالي القديمة زي مسسلات الريان والعار ودلع بنات، بيتشافوا لحد دلوقتي برغم عرضهم من أكثر من عشر سنين، ولما بيتعادوا دلوقتي بقعد أتفرج عليهم، وبكون نسيت الأحداث فبتفرج كأني معرفش اللي هيحصل، ومش كأني أنا اللي عملت ده، وببقى مبسوطة لما بلاقي رد الفعل ده والناس حابة تتفرج على الأعمال دي.

شيرين عادل تكشف سبب نجاح أعمالها المستمر

وكشفت شيرين عادل، سبب النجاح المستمر لتلك الأعمال، قائلةً: كنا زمان بنعمل الأعمال دي بروقان وكنا بناخد وقتنا صح والعمل بياخد وقته في التحضير والتصوير والكتابة، وكنا بنصور في وقت كويس وشكل الإنتاج كان مختلف عن دلوقتي، وكذلك المواضيع نفسها، يعني دلوقتي إيقاع العصر اتغير وكان زمان المسلسلات اجتماعية وعائلية وهي دي الحاجات اللي بتعيش، لكن دلوقتي المواضيع بتعتمد على الإثارة والأكشن والمواضيع العصرية.

شيرين عادل: بحاول أواكب العصر ومواضيعه

أكدت شيرين عادل، أنها تحاول مواكبة العصر في أعمالها، والحفاظ على الهوية الاجتماعية التي طالما اتبعتها في أعمالها، قائلةً: أنا برضه بحاول أعمل ده وأواكب العصر زي ما عملت في مسلسلات النمر وهوجان، كانوا أكشن ومواكبين لأحداث العصر، لأن إحنا في النهاية لازم نتطور ونتغير ونشوف الدنيا رايحة فين، وفي نفس الوقت بحاول لسة أحافظ على التيمة الاجتماعية في الأعمال. 

أعمال شيرين عادل

قدمت شيرين عادل العديد من المسلسلات البارزة على مدار مسيرتها الفنية، من بينهم مسلسل العار، الذي عرض في عام 2010، وشارك في بطولته كل من الفنان أحمد رزق، مصطفى شعبان، وآخرين، ومسلسل دلع بنات بطولة الفنانة مي عز الدين، وكذلك مسلسل الريان، بطولة الفنان خالد صالح.

الكوربة وضواحيها والساحل وتصادم أمواجه.. كيف اعتمدت أفلام المهرجانات الفنية على راحة الأعين وسكون الروح؟| تقرير