حسن شاكوش: في 50 أو 60 بيت مش هيلاقوا يأكلوا لو أنا قعدت في بيتي ومشتغلتش
كشف مؤدي المهرجانات الشعبية حسن شاكوش، تفاصيل أعماله الجديدة التي يستعد لطرحها خلال الفترة المقبلة، بعد توقفه لبضعة أشهر تضامنًا مع أهالي غزة، مشيرًا إلى أنه مضطر لطرح الأعمال لوجود مسئوليات تجبره على العودة لطرح الأغاني.
وقال حسن شاكوش خلال بث مباشر عبر حسابه على انستجرام: ورايا التزامات، ومعايا أخواتي وأهلي حوالي 5 أو 6 بيوت وفرقتي حوالي 40 فرد واللي شغالين معايا حوالي 7 أشخاص، ولو أنا قعدت في البيت الـ 50 أو 60 بيت دول مش هيلاقوا يأكلوا ومتعلقين بعد ربنا بيا أنا.
وعن غنائه للمهرجانات، أضاف حسن شاكوش: أنا مميز في الحتة ديه وأنا لما بغني بحب أني أكون متفاعل مع الجمهور بتاعي وفيه ناس من الجمهور بيحبوا رقصي، والواحد مش بيلبس بدلة رقص ويطلع يغني وربنا يخليلنا الناس اللي في ضهرنا ويحبونا واللي بيكرهنا بيقولنا ربنا يهديكم ويصلح حالكم لأننا وصلنا لمرحلة إن 95% مننا أننا بنكره الخير لأي حد ناجح حتى لو راجل بتاع ورنيش هنلاقي ليه أعداء.
حسن شاكوش: الشغلانة بتاعتنا ديه اللي ينام شهر ميبقاش موجود
وعن دعمه لأحداث فلسطين وتأجيله لبعض الحفلات، أوضح شاكوش: أنا كنت موقف شغلي شهرين أو تلات شهور عشان أخواتنا في فلسطين والواحد لو في أيده كان يعمل أي حاجة كنا هنعمل مش هنتأخر ووقفنا شغلنا شوية بس الشغلانة بتاعتنا ديه اللي ينام فيها شهر وميبقاش موجود الموضوع بيبقى صعب، والشغلانة دي مش عايزة النوم عايز 24 ساعة تفكر وتعمل.
واستكمل شاكوش حديثه: لو قعدت في البيت مش هلاقي أكل وأنتوا عارفين الدنيا عاملة ازاي والغلا والله يكون في عون ناس كتير يعني.. محدش قالي أوقف شغل، لكن ذوقيا مني مينفعش أشوف اخواتي بيموتوا في فلسطين وبقالي 3 شهورمشتغلش بسبب أخواتنا في فلسطين، ولو هتلاحظوا المواعيد اللي كنت ملتزم بيها والحفلات ومنزلتش منهم ستوري من حفلة على انستجرام ومبنزلش حتى الدعاية بتاعت الأماكن.
واختتم شاكوش حديثه: الفترة الجاية فيه شغل إن شاء الله كتير في إسكندرية.. إسكندرية ديه مش بلد ده شعب، وعندي كذا حفلة في أوروبا في فرنسا وهولندا ولندن لسه التواريخ ما اتحطتش وعندي في أمريكا.
