ناردين فرج: اقتبست شكل شخصيتي بـ صوت وصورة من مسلسل The undoing.. وشعري جنن الناس
تحدثت الفنانة ناردين فرج، عن تفاصيل مشاركتها في مسلسل صوت وصورة، والذي عُرض خلال الفترة الماضية وحققت خلاله نجاحًا كبيرًا بشخصية المحامية ماجدة علون، والتي لفتت أنظار الجمهور بستايل ملابسها وشعرها.
وقالت ناردين فرج في حوارها مع القاهرة 24، إنها اقتسبت ستايل شخصيتها في مسلسل صوت وصورة، من المسلسل الأمريكي the undoing، موضحة: لما قعدت مع المخرج محمود عبد التواب (توبة)، قالي اتفرجتي على مسلسل the undoing؟ ده مسلسل 7 حلقات بتاع نيكول كيدمان وهيو غرانت، وسألني على شخصية المحامية في المسلسل وأنا مكنتش فكراها، قالي اتفرجي عليها تاني، الست دي كانت بتدافع عن هيو غرانت اللي خان مراته مع واحدة واتقتلت وشكوا فيه أن هو اللي قتلها، وهي كل همها تطلعه برئ حتى لو شاكة فيه، وقالي شوفي الست دي معندهاش قلب إزاي، وأنا خدت منها ستايل اللبس وحسيت أن ده بيدي شكل القوة.
أما عن ستايل الشعر التي التزمت به خلال أحداث العمل، فعلقت نادرين فرج قائلة: تسريحة شعري في مسلسل صوت وصورة جننت الناس، وأنا كنت قاصدة إني مغيرش شكلي، لأن الشخصية كانت محامية شيك وأنا فكرت فيها لاقيت أن مفيش حد فينا بيغير شعره في الحقيقة ومش بنغيره كتير، كل واحد فينا شخصيته في شعره ولبسه.
وتابعت: أنا حبيت إني أغير من شكلي كممثلة وأنا بعمل شعري كده في الصيف، وفي الأول قعدت مع المخرج كان عايزها شخصية صارمة وجامدة ومفيش عندها قلب، ولاقيت أن لما أعمل شعري كده ده هيبين ملامح الوش أكتر وهيضيف للشخصية وشكلها، خاصة أنها ظاهرة طول الوقت في الشغل، ومكنتش مهتمة أن الشخصية يكون شكلها حلو ومختلف على قد ما اهتميت أني أبرز الشخصية.
وأضافت: مكنتش متخيلة أن شكل شعر الشخصية هيفرق كده مع الناس، ومش عارفة عرفوا منين المنتجات اللي كنت بستخدمها وقت المسلسل مع إني مش جايباهم من مصري دي حاجتي الشخصية، ولكن ملبستش باروكة ولكن شكل شعري في مسلسل الغرفة 207 كان في حقبة زمنية مختلفة، بالتالي كان لازم أغير شعري بالشكل بتاع الحقبة دي ولبست باروكة لأني مكنش ينفع أقص شعري، على قد ما الباروكة بتريح الممثلين ولكن شكلي عمره ما بيبقى طبيعي حتى لو جبت أغلى واحدة، وأنا من الناس اللي مبتليقش عليا.
أبطال مسلسل صوت وصورة
مسلسل صوت وصورة بطولة حنان مطاوع، صدقي صخر، عمرو وهبه، ناردين فرج، مراد مكرم، وليد فواز، نجلاء بدر، فدوى عابد ومن تأليف محمد سليمان عبد المالك، وإخراج محمود عبد التواب.
