شريف عمر: السوشيال أتاحت فرصة أكبر للناس عشان تشتغل.. وضد مهاجمة الفنانين بسبب شغلهم وقت الحرب على فلسطين
كشف الفنان شريف عمر رأيه عن اختلاف الفن في الوقت الحالي مقارنةً بالألفينيات، متحدثًا عن هجوم الجمهور على الفنانين بسبب أعمالهم في ظل الظروف الفنية والتقنية الحالية.
وقال خلال لقائه مع القاهرة 24: حاجات كتير اتغيرت يمكن تخص الشغل والإخراج، وحتى التمثيل ذاته، لإن احنا في وقت من الأوقات كنا بنشتغل بكاميرات ديچيتال، دلوقتي بقي الوضع في الدراما أقرب للسينما، نفس ستايل السينما بالظبط، وطبعًا ده بيخلي الفنان يغير تمثيله.
وتابع شريف عمر: دلوقتي فيه سوشيال ميديا وفيه منصات كتيرة، كل ده أتاح فرصة أكبر للناس عشان تشتغل، زمان أول ما بدأنا كان الموضوع صعب ومكنش فيه سوشيال ميديا، كانت القنوات العادية هي اللي موجودة بس، ومكنش متاح إن من خلال الأكونت بتاعي أقدر أنتشر وأثبت موهبتي وشطارتي في الشغل، بس دلوقتي أعتقد إن في اختلافات كتيرة حصلت.
عن رأيه في المنصات، قال: المنصات كويِّسه، بتدي فرص شغل لناس كتير، وبتساعدهم يحققوا نفسهم، وبأفكار مختلفة، لكن عندي مشكلة مع المنصات، إن فيه ساعات مسلسلات بتتظلم عليها ومبتاخدش حقها.
وأضاف عمر: دلوقتي فيه مسلسلات بتنزل مابْتتشفش كويس، وبيكون معاد نزولها مش مناسب لكل الناس، لكن زمان كان فيه قنوات معينة يتعرض عليها كل المسلسلات، والناس بتبقى عارفة كل حاجة عنها، وده كمان ضمن الفروقات اللي موجودة دلوقتي.
شريف عمر يعلق على هجوم الجمهور على الفنانين
في سياق آخر، علق شريف عمر على هجوم الجمهور ضد الفنانين بسبب استمرار قبولهم للأعمال في الظروف اللي بتمر بيها أهالي فلسطين، رأى: كل واحد بيحسب الحاجات بظروفه ووقته، في حد ممكن يبقى مضطر إنه يشتغل لإنه محتاج دخل ووراه التزامات ومسؤوليات، فهي بتختلف من شخص لشخص، وفي النهاية الحياة مابتقفش على حد، على عكس ناس بتشوف إنها نفسيًا مش قادرة تشتغل في الظروف دي.
