نشوى مصطفى عن مشاركتها في إمبراطورية ميم مع خالد النبوي: مخسرتش تحويشة الـ10 سنين اللي مشتغلتهمش
أعربت الفنانة نشوى مصطفى عن سعادتها الشديدة، بعودتها للدراما من جديد، بعد غياب 10 سنوات عن الساحة، حيث أكدت أنها تعود للتمثيل من جديد من خلال مشاركتها في مسلسل إمبراطورية ميم، بطولة الفنان خالد النبوي.
وكتبت نشوى مصطفى منشورًا، عبر صفحتها الشخصية على موقع التواصل الاجتماعي فيس بوك، قالت فيه: تحويشة العشر سنين اللي فاتت اللي مشتغلتش فيهم آخرها جبر كبير، فرحانة إنى مخسرتش سنين عدت رغم قسوة إن الفنان مايمارسش فنه، بس الحقيقة ومعرفش هتصدقوني ولا لأ، لما كان يتعرض عليا دور مش حاساه، كنت بعتذر، وأنا بتقطع بس كنت بقول حقي في المرحلة دي، واللي باقي من العمر إني استمتع وأنا بعمل فن.
نشوى مصطفى تشيد بـ خالد النبوي
وتابعت نشوى مصطفى: إيه متعة أكبر من إنى باذن الله أكون واحدة من فريق عمل عظيم وراقي، نص محترم، إخراج واعي، إنتاج لشركة أعمالها ترند وخالد النبوي، أقصد الخالد النبوي، خالد اسمه لازم يسبقه ألف ولام، بغض النظر عن حضوره اللي ربنا صارفهوله بزيادة، هو كمان ممثل هاند ميد، ممثل يعلى اي ممثل يقف قدامه، ممثل هاوى بيذاكر وبيعيش وبيحس بمنتهى إجتهاد الممثل الهاوي، بمنتهى الاحترافية، يا يا بختي حقيقي.
واختتمت نشوى مصطفى: بالمناسبة ده سادس عمل باذن الله أمثل فيه مع خالد، الشاطر يقول أسماء الأعمال اللي اشتغلت فيها مع خالد، هقول اسم العمل الأول وكنا لسه طلبة فى المعهد، مسرحية البحر بيضحك ليه وللاسف متسجلتش، كلى ثقة فى توفيق ربنا وكرمه باذن الله دعواتكم أكون عند حسن ظن حضراتكم.
