كريم قاسم: مسلسل زينهم أحسن حاجة حصلتلي في 2023.. وشخصية جيمي متلبّساني
تحدث الفنان كريم قاسم، عن أحدث أعماله الفنية مسلسل زينهم، بطولة الفنان أحمد داود، بالتوازي مع عرض آخر حلقاته.
وقال كريم قاسم مع نهاية عام 2023 في تصريحات إذاعية: زينهم أحسن حاجة حصلت لي السنة دي ودي حاجة كويسة الواحد يقفل بيها السنة.
كريم قاسم: مسلسل زينهم أحسن حاجة حصلتلي في 2023
وعن شخصيته دكتور جيمي، أوضح كريم قاسم: الشخصية متلبساني قوي وأي حد من أصحابي بيشتكي لي من حاجة في جسمه بقيت بقول له وريني كده وأقعد أفسر له وأتحقق من الموضوع.. كنت متخيل الموضوع هيبقى أصعب من كده لكن اللذيذ إن الكاتب طبيب فكان في مصطلحاته وتفسيره ساعدنا، وكان فيه أصدقاء دكاترة ساعدونا وبرده من كتر الفرجة على شخصيات الدكاترة قبل كده.
وتابع: التركيز في المسلسل أكتر على القضايا والجانب الإجتماعي للشخصيات والمخرج بذكاء حاول يتفادى مناظر الجثث والإصابات علشان يبقى مناسب للأطفال والعيلة مع إنه كان يقدر يدخل في التفاصيل.
وأوضح كريم قاسم: أول ما قريت الورق حسيت إن جيمي ده دوري ومكتوب لي لأني كنت متخيل هعمل فيه إيه، واللي اتنفذ كمان عدى اللي كنت متخيله بعد التعاون مع المخرج اللي كان فاهم جدًا وكمان الشغل مع أحمد داوود زي لعب الكورة وبنساعد بعض وكنا داخلين ننبسط وكنا محضرين كويس.
وأكد كريم قاسم: كنت خايف طبعًا، ولأول وهلة دخول المشرحة رغم إنها ديكور لكن كأنها مشرحة حقيقي وفيها قبضة، ومع أول جثة وتصوير كان الموضوع بيخض لحد لما اتعودنا بعد كده.
مسلسل زينهم بطولة أحمد داوود، كريم قاسم، سلمى أبو ضيف، هناء الشوربجي، محمد أبو داوود، أحمد الرافعي، عماد رشاد، وآخرين، تأليف محمد سليمان عبد المالك، وإخراج يحيى إسماعيل.
