شاهدة عيان على انهيار عقارين بروض الفرج: لقينا العمدان بتفرقع وكل حاجة اتدمرت والأهالي عايشين في الشارع|فيديو

قالت نانسي، شاهدة عيان على حادث  انهيار عقارين في روض الفرج محافظة القاهرة، إن الانهيار وقع عندما بدأت تتساقط الأعمدة، حيث أنها تقيم بجانب العقارين المنهارين، وخلال وجودها بالمنزل فوجئت ببعض أهالي المنطقة يطالبونها بمغادرة العقار حفاظا على سلامتها وباقي الأهالي، وذلك لأن العقار المجاور لها يهتز ومعرض للانهيار.

تفاصيل انهيار عقارين في روض الفرج

وأضافت شاهدة العيان، أنه بعد ساعتين من إخبارها بأن العقار مهدد بالانهيار سقط على عقار آخر، قائلة: بعد ساعتين ومرة واحدة لقينا العمارة بتقع وخدت معاها العمارة اللي جنبها، وفضلنا كلنا نجري في الشارع والمنظر كان صعب ومحدش لحق يجيب حاجة من الشقق.

انهيار عقارين في روض الفرج

واستطردت شاهدة العيان: بعد ما بلغونا لقينا فيه طوب ورمل بدأ ينزل من العقار، وبدأت العواميد تفرقع وتنزل في الشارع، وإحنا كلنا كنا موجودين في الشارع، والناس اللي كانوا ساكنين في العمارة اللي وقعت نزلوا وهما بيجروا ملحقوش ياخدوا حاجة معاهم من بيوتهم وبقوا في الشارع وكل حاجتهم اتدمرت بعد ما العمارتين وقعوا عليها.

وواصلت الشاهدة حديثها قائلة: الناس اللي كانت في العقارين بقالهم 3 أيام قاعدين في الشارع مش عارفين يروحوا فين بعد ما العمارتين وقعوا، وكل شوية يجوا يحاولوا يلموا الحاجات بتاعتهم من الحطام، بس يبصوا يلاقو كل حاجتهم اتدمرت حتى الهدوم مش عارفين يلبسوها وحياتهم شبه اتدمرت.

وكانت قوات الحماية المدنية بالقاهرة، تلقت بلاغًا يفيد بانهيار عقارين في منطقة روض الفرج، وعلى الفور انتقلت الأجهزة الأمنية ورجال الحماية المدنية مصحوبين بسيارات الأسعاف ومعدات النقل الثقيل، وبالفحص تبين أن العقارين صادر لهما قرار إزالة، وجرى تحرير المحضر اللازم بالحادث واتخاذ الإجراءات القانونية.