فارق 116 مليون جنيه.. متحدث الموسيقيين يكشف أرصدة النقابة بالبنوك بعد تولي مصطفى كامل
كشف أعضاء نقابة المهن الموسيقية، أرصدة حاسابات النقابة بالبنوك، بعد تولي الفنان مصطفى كامل منصب النقيب، وذلك عقب تلميحه بالاستقالة من منصبه.
وقال الدكتور محمد عبد الله، المتحدث الرسمي باسم نقابة المهن الموسيقية، خلال تواجده برفقة أعضاء النقابة في منزل الفنان مصطفى كامل، لإقناعة بالعدول عن قرار الاستقالة: أرصدة البنوك يوم 30\1\2024، صندوق المعاشات والإعانات فيه 8 مليون و191 ألف جنيه وكسور، وصندوق النقابة 2 مليون 840 ألف و985 جنيه، صندوق الإسكان 2 مليون و684 ألف و877 جنيه، البنك الأهلي المتحد 166 مليون و796 ألف.
وتابع محمد عبد الله موجهًا حديثه للفنان مصطفى كامل: حضرتك لما استلمت النقابة والحساب كان فيه كام؟ ليرد مصطفى كامل: 69 مليون.
وأضاف محمد عبد الله: بنك مصر 595 ألف، يعني إجمالي 181 مليون جنيه، يعني الفارق 116 مليون جنيه فرق في سنة، وعايزنا نستغنى عنك؟ مستحيل.
مصطفى كامل: لو حد شاف تليفوني هيجي له حالة لُطف
وعلق مصطفى كامل: دي مؤسسة يا جماعة في ظل انهيار مؤسسات كبيرة في الدولة، ومش عارفين يستفيدوا، وأنا مش قصدي تستغنوا عني، أنا راجل عسكري وطالب انضباط، دلوقتي المؤسسة دي مينفعش يطلع في موظف عندك أو يتشتم زميلي وأنا تاني يوم بضايف اللي شتمه، ودي حاجة من الاتنين يا إما أنت قابل بإهانة زميلك يا إما أنت راجل ضعيف، وأنا مش راجل ضعيف، قولنا دي دورة جديدة ودي ممكن يحتاج لها حد لو فرضنا أنه وضيع المستوى والنفس قبل انتخاباته بـ 3 شهور علشان يمسك الكرسي.
واستكمل: أنا مش نازل انتخابات تاني وقولتلكم تعالوا نأسس كيان بعد كده لما نسيبه كل واحد فينا عنده تخيل أنه بيصنع حاجة حلوة، لأن قبل كده الحاجات كانت وحشة، وبعد كده اللي هييجي بعدي هبقى نايم في بيتي مرتاح لأن الأهداف كانت نبيلة، أنا وريت حد تليفوني دلوقتي ممكن ييجي له حالة لُطف، أنا وصلت لمرحلة مبقاش زملائي بس اللي بيكلموني علشان مشاكل، دول زملائي ونقباء فروع، أبقى قاعد في بيتي الساعة 3 بالليل عايز أشوف شغلي ألاقي أرقام مديرين أعمال عيال معرفهاش، وصلت بيا مديرين المسارح بيكلموني.
