بنتهان ويتهتك عرضنا بالكلام.. مصطفى كامل: نطالب بالاهتمام بنقابة الموسيقيين لأننا مش زي أي حد

طالب الفنان مصطفى كامل، الجهات المختصة بالاهتمام بالبلاغات التي تقدمها نقابة المهن الموسيقية، مؤكدًا أن دور النقابة لا يقل عما تقدمه أي نقابة أخرى في الدولة.

وقال مصطفى كامل، لـ القاهرة 24،على هامش حضور أعضاء مجلس إدارة نقابة المهن الموسيقية بمنزله لدعمه ومساندته بعد تلميحه بالاستقالة: أنا بطالب لا بد من معاملة نقابة المهن الموسيقية معاملة كجهة جوا الدولة تشبه الوزارة أو أقل، المفروض يكون لها اهتمام أكتر من الأشخاص العاديين.

وتابع مصطفى كامل: إحنا المفروض بلاغتنا ضد الصفحات الهادمة لمؤسسة كبيرة بتخدم أكتر من 100 ألف أسرة، إحنا مش المفروض نتعامل زي أي حد رايح يقدم بلاغ في صفحة وتعد سنتين أو تلاتة، ده حرام وبالأمانة غير مقبول، إشمعنى النقابات التي لا تؤجر على عملها وفيها ناس شرفاء مسموح بهتك عرضها وعرض أسرها على صفحات الإنترنت؟، إحنا بنطلب المحاسبة القانونية.

وأضاف: عيب أنا مش نازل من بيتي علشان أقدم عمل خدمي وأشيل شريحة من مجتمعي وشريحة من زملائي، علشان بالليل بنتي وابني يقرأ سب فيا، ميقبلش ده غير راجل مبتذل وحرامي أو دون المستوى أنا مش هقبله على نفسي.

وأكمل: اللي معاه حاجة علينا يروح يقدمها للنيابة، يعني هو ده جزائي؟ بعد ما سيبت ولادي وبيتي واستقطعت من وقتي وجهدي وأكل عيشي؟ ده إحنا سننا كل ما بيكبر كل ما اسمنا بيقل، وحتى العزم ده بيتي أولى بيه، ولما تستخره في بيتك وتنزل تخدم بيه زملاءك ربنا اللي هيجازيك عليه، والنقابة مقدمة دورها على أكمل وجه والمعاشات اترفعت النص، أنا عملت كل ده علشان أتشتم؟، أنا عملت إيه وحش في المكان علشان أتهان؟.