قاتل شاب مصر الجديدة: مات غصب عني وحاولت أنقذه معرفتش
كشفت التحقيقات تفاصيل مثيرة في واقعة مقتل شخص بمنطقة مصر الجديدة على يد قهوجي، بعد الاعتداء عليه في مشاجرة بمحل سكنهما، بسبب غيرة العمل التي أدت إلى مقتل المجني عليه وإزهاق روحه.
مقتل شاب مصر الجديدة
وحصل القاهرة 24 علي نص تحقيقات في القضية، وجاءت أقوال المتهم رضا، خ، في القضية التي حملت رقم 7024 لسنة 2023 كالتالي: اللي حصل إن مشادة حصلت بيني وبين المجني عليه في الشغل، لأننا بنخلص شغل وبنقفل القهوة بتبقى الساعة مثلا 6 الصبح، وروحت أنا وسامي مشي، وكنت بتكلم معاه أني هتخانق مع علي، وهعمل معاه مشكلة، لأنه بيتعامل معايا بأسلوب وحش، وبعد كده لما وصلنا تحت البيت، سامي جاب فطار وطلعنا على فوق، بس أنا مطلعتش أوضتي، طلعت على أوضة المجني عليه علي في الدور الأول، وبعد كده لقيته قاعد بيعمل سلطة وماسك سكينة مطبخ في إيده وكان معاه أحمد.ن.
وأضاف المتهم خلال أقواله: دخلت عليه واتخانقت معاه، ووقف وقالي اطلع بره بدل ما تزعل مني، أو هعورك، وكان ماسك السكينة، بس مهجمش عليا ولا عمل حاجة، قمت أنا ضاربه في صدره فوقع، قام ماسك فيا وشد التيشرت، قمت أنا مسكت فيه وحاولت أخد منه السكينة وهو بيحاول يشدها وأنا أصلا صباعي اتعور من الشد.
وأكمل المتهم: بعد كده واحنا بنشد من بعض قمت عورت المجني عليه غصب عني، وأخد طعنة في صدره من ناحية الشمال، وساعتها بس قدرت أخد منه السكينة، وهو كان بيحاول يشدها بردو، لحد ما السكينة إتنت وأنا صباعي أتعور من الشد، وبعد كدا وإحنا بنشد بعض قومت عورت المجني عليه غصب عني، وأخد طعنة في صدره، وساعتها قدرت أخد السكينة بعد لما اتعور، ولما لاقيناه بينزف قمنا سدينا مكان الدم وأخدناه على تحت، ووقفنا تاكسي، وحاولنا نلحقه وروحنا على مستشفى منشية البكري العام.. لكنه مات، وده كل اللي حصل.
