حسان العربي: أنا عامل 130 مسلسلا.. وبرفض أعمال تحت السلم مش هقلل من نفسي
أكد الفنان حسان العربي، أنه رفض المشاركة في العديد من الأعمال الفنية حفاظًا على قيمته كممثل، موضحًا أنه شارك في 130 عملا تليفزيونيا.
وقال حسان العربي، في لقائه مع القاهرة 24: أنا عامل 130 مسلسل ومسرح وسينما، واشتغلت حاجات مش كوميدي علشان ميصنفونيش إني كوميدي.
وتابع حسان العربي: أنا جالي أعمال تحت السلم ومبحبش أقلل من نفسي كممثل، ولا يصح إلا الصحيح، أنا معنديش مانع أعمل عمل فيه أبطال وأمثل فيه مشهدين، المهم الناس اللي هتتفرج عليا، وقيمتي تتقدر.
كما أعرب حسان العربي، عن استيائه بسبب قلة أعماله الفنية وضعف أجره، قائلًا: يعني أنا دلوقتي لما أعمل مشهد أو حلقة هتديني مبلغ وقدره؟ لأ هتديني على قد المشهد أو الحلقة وده حقك، ولكن أنا هكمل إزاي باقي السنة؟ وصلونا لمرحلة متعبة جدًا، هو أنا باخد ملايين علشان أعمل مشروع؟ ده اللي جاي بيروح وبنحاول نجيب عليه فلوس.
حسان العربي يكشف سبب غيابه عن الوسط الفني: مش عارف أصرف على بيتي
وكشف الفنان حسان عربي، سبب غيابه عن الوسط الفني، قائلًا: بيتقال أن أعضاء النقابة بيرفضوا الشغل الصغير، ما أنا من حقي أنك متصغرنيش، أنت هتديني إيه لو جيت اشتغلت معاك حلقة لو جيت قولتلك سعر مش هتديهولي أصبح أنا دلوقتي هصرف على بيتي إزاي؟ دي مهنتي وشغلتي ودي دراستي وتعبت فيها، فمن حقي أني أشتغل.
