الغالي ميلزمناش.. كيف يستعد المصريون لاستقبال رمضان مع تفاوت الأسعار؟
أيام قليلة تفصلنا عن حلول شهر رمضان 2024، الشهر الذي ارتبط لدى المصريين ببعض العادات والتقاليد، منها إعداد وتحضير العديد من الوصفات والأصناف الغذائية على مائدة الإفطار، الأمر الذي يستلزم العديد من التجهيزات والاستعدادات، والتي تتضمن تفريز الخضراوات والفاكهة واللحوم، وتخزين السلع والمنتجات الغذائية، ولكن مع تفاوت الأسعار قد تجد فئة كبيرة من المستهلكين صعوبة في تحضيرات رمضان، ورصد القاهرة 24 آراء بعض المواطنين بشأن غلاء الأسعار واستعدادات شهر رمضان.
استعدادت المصريين لشهر رمضان وتفاوت الأسعار
وقالت أسماء لطفي البالغة من العمر 27 عامًا وهي زوجة وتعمل بأحد المستشفيات الخاصة، في تصريحات خاصة لـ القاهرة 24: بالرغم من غلاء السلع الغذائية، إلا أن اليوم اللي بيعدى بيكون ببركة ربنا، مع اللجوء لبعض الحيل لتدبير أمور المعيشة، زي استبدال بعض البراندات بالأقل سعرًا.
وتابعت: كنا بناكل 4 مرات بروتين في الأسبوع، ولكن بدأت أبحث عن البدائل النباتية، زي العدس، واستبدلت النسكافيه بالشاي.
وعن الاستعدادات والتجهيزات المتعرف عليها لدى المصريين قبل حلول شهر رمضان، أضافت أسماء: من فتره بدأت أخزن فعلًا لما كانت الأسعار في المتناول، دلوقتي الحاجات الغالية الناس بقت تستغني عنها، وخاصة إن كل يوم الأسعار بتزيد وبشكل مبالغ.
وتجد إيمان عامر، ربة منزل، أن تجهيزات رمضان أصبحت مكلفة للغاية، قائلةً: لما جيت أفكر في تجهيزات رمضان، لقيت إن الأمر مكلف، يعني كنت قبل كده بجيب بخزن بط وفراخ وحمام وسمنة بلدي واللحمة من عند الجزار، لكن دلوقتي بقيت ألجأ لطرق وحلول بديلة، زي اللحمة البرازيلي والزبدة بدلتها بالزيت عشان أعرف أطبخ، وكنت في الأول أحب أحضر حلويات كتيرة، لكن دلوقتي ده مش سهل، وأقل نوع حلويات الكيك وبردوا أصبح مكلف، وأصبحت أمشي اليوم بيومه لحد ما الأسعار تظبط.
رصد لأراء المواطنون
وأضافت إيمان عامر: في سلع غذائية أساسية منقدرش نستغنى عنها مهما ارتفع سعرها وملهاش بديل، ومنها البيض واللبن والجبنة، ومن بعد ارتفاع الأسعار استبدلت أنواع الجبنة البيضة بالجبنة القريش واللبن المعلب بـ الحليب الفلاحي والزبادي بقيت أحضره في البيت، ولكن في العادي أسعار البدائل مرتفعة، وعلطول كنت بشوف والدتي بتخزن وتحضر قبل رمضان، لكن دلوقتي أنا بقيت مش عارفة أعمل ده وبالرغم من إنني فردين فقط.
وترى إيمان عامر، أنه بالرغم من تفاوت الأسعار إلا أن هناك بعض التقاليد والعادات الرمضانية، ومنها العزومات والزيارات، وقد تكون هذه الأمور مكلفة لدى البعض من غير القادرين ماديًا، إلا أنها قررت أن تتماشى مع الظروف وتجهز بعض السلع التي تحتاجها.
وقررت وسام محمد، صاحبة الـ 27 عامًا من عمرها، وهي زوجة وأم لطفلتين، الاستغناء عن العديد من الأمور التي تتعلق بالتجهيز لشهر رمضان، حيث قالت: هستغنى عن الياميش ومش هخزن سمنة، وهشتري الحاجة كيلو بكيلو، والأساسيات هشتريها باليوم، حتى حلويات رمضان ممكن أعمل مرة كنافة ومرة قطايف، واستغنى عن تفريز الخضار والفاكهة واللحوم، حتى زينة رمضان سعرها زاد وقررت استبدلها بزينة منزلية وهعملها أنا في البيت.
وتابعت وسام: أنا عندي أكتر من بند لمصاريف المعيشة غير الأكل والشرب، عندي الغاز والكهربا والمياه وغيرها، ده غير إننا داخلين على العيد وهنحتاج لبس جديد، وقررت أشتري لكل طفلة من أطفالي طقم واحد فقط للعيد، على عكس ما كان في السابق، كنت بجيب 3 أطقم لكل يوم في العيد طقم جديد، ولبس يوم الوقفة، ولكن كل ده كان أساسيات لشهر رمضان والعيد، وفي ظل تفاوت الأسعار أصبحت رفاهية.
الغالي ميلزمناش
فيما قال الحاج محمد أحمد، سائق على المعاش: الناس اللي بتشتكي من تفاوت الأسعار بتفتري، ومن الضروري إننا نمشي على القد ونعدي اليوم بيومه، لكن المصريين تعودوا على الأكل بزيادة، لكن أنا أويد مبدأ الحاجة الغالية مجبهاش، ومش هنموت من الجوع، وبالفعل أنا مريض وممنوع من تناول أصناف عديدة، هل أنا كده ممكن أموت؟.. بالعكس الناس بتتعب وييجي لها المرض من الأكل، الأسعار طول الوقت عالية وهتفضل في زيادة، زمان الناس كانت بتحلى الشاي بالكرملة بسبب أزمة السكر، لكن دلوقتي كل السلع موجودة آه غالية بس موجودة، وممكن نشتريه من معارض بسعر مخفض.
وتابع الحاج محمد: الغلاء موجود من يوم ما اتخلقنا، لكن الناس بتنسى، محدش بيموت من الجوع، إحنا لسة مكلناش ورق الشجر، المصريين مبيقولوش الحمد لله وكل يوم عايزين لحمة، في حين إن 50 جنيه ممكن تأكل أسرة مكونة من 5 أفراد في اليوم.
ويعتقد أشرف سعيد، البالغ من العمر 49 عامًا، وهو أب لـ 3 من الأبناء، أنه من الأفضل العمل بمثل الجودة بالموجودة، وأن السلع المرتفعة في السعر قد تكون غير ضرورية في الكثير من الأحيان، قائلًا: السلع الغالية مش هنشتريها، ومن الأفضل نمشي على القد، أي نعم هنعمل كحك العيد بس على قد الاحتياج، وبـ 50 جنيه ممكن نمشي يومنا عادي، فطار وغداء وعشاء، لو استبدلنا البروتين الحيواني بـ النباتي هنعرف نتغلب على تفاوت الأسعار، وممكن أعمل عزومات في رمضان.
رد شعبة المواد الغذائية
ومن جابنه، أكد حازم المنوفي، عضو الشعبة العامة للمواد الغذائية بالاتحاد العام للغرف التجارية، في تصريحات خاصة لـ القاهرة 24، أنه من المتوقع انخفاض أسعار بعض السلع الغذائية بالتزامن مع حلول شهر رمضان، وخاصة مع طرح كميات كبيرة من السلع، وافتتاح عدد من معارض أهلًا رمضان ببعض المدن والمحافظات المصرية، وبالتالي هناك توقعات بانخفاض أسعار السلع الغذائية.
