ميدو: شيكابالا عمل غلطة كبيرة وكان هايمشي من الزمالك وأنا حليت مشكلته
كشف أحمد حسام ميدو نجم نادي الزمالك، عن كواليس أزمته مع مرتضى منصور رئيس نادي الزمالك السابق، وتدخله لـ حل أزمة شيكابالا قائد القلعة البيضاء الحالي.
تصريحات أحمد حسام ميدو
وقال أحمد حسام ميدو في تصريحات تليفزيونية، بشأن توجيه ألفاظ خارجة للاعبين أثناء التدريب: كل اللي دربتهم بيحبوني رغم إني بتعصب وبشتم، بيخافوا مني ساعات لأني ملتزم جدًا وبروح أول واحد وممنوع حد ينزل بعد ما أنا أنزل.
وأضاف ميدو: أنا مش كسول وبشتغل كتير وبصحى بدري، وحققت كل أحلامي الحمدلله وهدفي أسفر إن أصبح من مصر 30 أو 40 واحد يلعبوا برا.
واستكمل: عمرو أديب موقفش جنبي في مشاكلي مع مرتضى منصور، ولكن ساعتها كان هو ومرتضى رافعين قواضي على بعض فـ موضوعنا جه في حتة واحدة، وحلقتي مع عمرو أديب أعلى نسبة مشاهدة في تاريخ الوطن العربي، وكنا مرتبين كل حاجة ومرتضى منصور كان مقعد 40 محامي مستنينا نغلط فيه.
وواصل ميدو حديثه قائلًا: اتصالحت مع مرتضى منصور مش اعتذرتله، وولاده صحابي، أنا مكنتش ناوي أصالحه وبعرف آخد حقي الحمدلله، واللي حصل إن شيكابالا كان عمل غلطة كبيرة جدًا وكانوا هيمشوه من الزمالك، روحت واخد شيكابالا وذهبت لـ مرتضى منصور المكتب رغم الخناقات اللي بينا وموديله بلطجية وكده ولكن ولا يهمني، وهو بيحبني جدًا، قالي انت بتجبلي بلطجية قولتله أمال أجيبلك ملبس، ما أنت كمان بتجيب بلطجية احنا بنحمي بعض بس، قولتله موضوع شيكابالا يخلص وخلصنا الكلام.
وأتم ميدو تصريحاته قائلا: عمرو أديب موقعنيش في مرتضى لكنه زعل جدًا بعد ما اتصالحت معاه، وعمرو أديب ممكن يطلع أهلاوي وبيلعب بلقطة الزمالك عشان واكلة في الميديا، ده يعمل أي حاجة عشان ينجح برنامجه، والزمالك نادي القرن ومفيش حاجة اسمها الأهلي هو نادي القرن مفيش الكلام ده.
