مها أحمد: مقللتش من السقا وأمير كرارة بسبب نسل الأغراب.. ورافعة 4 قواضي على فادي خفاجة
تحدثت الفنانة مها أحمد عن مشاجرتها مع الفنان أحمد السقا وأمير كرارة بسبب مسلسل نسل الأغراب، وعن قضيتها مع الفنان فادي خفاجة.
وقالت مها أحمد في تصريحات تليفزيونية: الغضب مخسرنيش أحمد السقا وأمير كرارة، ومقصدش أزعل أحمد وأمير، وساعتها مقللتش منهم، والسقا أخويا ولو شاف حاجة معجبتوش فيا بيقولي، لكني غلط إني عاتبت على السوشيال ميديا.
وأضافت مها: أيامها مكنش عندي دراية بقوة وجبروت السوشيال ميديا وموضوع التريند، وكنت بعيدة عن السوشيال ميديا، ولما لقيت الناس عاملة أكونتات فيك قلت لاء أعمل أكونت خاص ليا، وقلت أقعد أفضفض مع نفسي عالسوشيال، نمت صحيت لقيت الدنيا مقلوبة عليا، واكتشفت أن في ناس في السوشيال بتكرهك أكتر ما بتحبك.
مها أحمد: الفنانين كانوا محايدين في مشكلتي مع السقا وأمير كرارة
واستكملت مها حديثها: معملتش حاجة تستاهل إني أعتذر لكرارة والسقا، ومجدي عاتبني وقالي كنتي قلتيلي أو فضفضتي معايا الأول، وكان ممكن أشيل البوست اللي عملته، لكن لقيت في توابع فيها تطاول، فا قلت مش هشيله، مضيفة: كل الفنانيين كانوا محايدين حتى النقابة، في فنانات ومذيعات مرتزقة كتبوا شكر للسقا وكرارة، على أساس إني بنت البطة السودة.. واللي فرق معايا 3 أشخاص، واحدة قعدت تشكر ف المسلسل وبعدها كلمتني، والتانية معروف إنها صاحبتي وفجأة لقيتها كاتبة بوست طويل عريض بتشكر في تربيتهم، والناس في الكومنتات بتقلها طب وصاحبتك؟، وأنا معاتبش حد بالعكس هسيبه على عماه.
وعن مشاكلها مع فادي خفاجة، أوضحت مها: عندي شهوة للستر إن أي حد يقول عليا حاجة وحشة أو حاجة مش فيا وأنا ناجحة.
وواصلت: أنا رفعت 4 قواضي على فادي خفاجة، منهم سب وقذف وتحرش، وهرفع قضية على منصة التيك توك، وهي مضمونة وأكسبها وأنا مغمضة لأنه حقي وعندنا قانون وقضاء عادل هيجيبلي حقي بالقانون.
واستكملت: مؤمنة جدًا بالحسد وبحب ألبس حاجة زرقا عشان تحميني من الحسد وبقرأ قرآن قبل ما طلع لايف وأثناء اللايف، لأن معظم الفنانين قاعدين بيتفرجوا عليا ويحسدوني على الريتش بتاعي.
