طيرت كل واحد في ناحية.. شاهد عيان يكشف مصرع شخصين على يد مسؤولة بشركة BMB أمام مول العرب | خاص
كشفت التحقيقات في القضية رقم 7219 لسنة 2023 جنح قسم أول أكتوبر والمتهمة فيها سهر.خ مسؤولة مبيعات شركة BMB للعقارات لاتهامها بقتل شخصين خطأ، نتيجة قيادتها برعونة وعدم احترازها وعدم مراعاتها للقوانين، أمام مول العرب.
شاهد بواقعة دهس شابين أمام مول العرب
وقال شاهد عيان في واقعة دهس شابين أمام مول العرب: انا جيت علشان أشهد في واقعة الحادث الخاصة بالقضية رقم 7219 لسنة 2023 جنح أول أكتوبر واللي حصل أنا شغال حلاق في محل بيكي بارير فرع مول العرب في أكتوبر ومعايا في الشغل حميدة وعبد العزيز - الله يرحمهم، وكنا خارجين من الشغل على الساعة 12 بليل واحنا كنا بنعدي الطريق من قدام مول العرب للناحية الثانية وانا عديت وأول ما عديت لسه بلف لقيت عربية جات كانت بتجري بسرعة جدًا وخبطتهم هما الاثنين وكل واحد منهم طار في ناحية.
وأضاف شاهد عيان بواقعة دهس شابين أمام مول العرب: نزل من العربية البنت اللي كانت سايقاها وكانت عمالة تعيط وطلبت الإسعاف وجات الإسعاف أخدتهم وجات النجدة وقبضت عليها وانا روحت معاهم على المستشفى وهناك عرفت انهم هما الاثنين توفوا وجيت على النيابة أقول اللي حصل واللي شفته بما يرضي الله.
دهس شابين أمام مول العرب
وأردف الشاهد بأقواله أمام جهات التحقيق: الكلام ده حصل عند المحور المركزي أمام مول العرب الناحية الثانية وانا كنت مع حميدة وعبد العزيز - الله يرحمهم وكنا لسه مخلصين شغل وكنا مروحين.
وأضاف شاهد واقعة مصرع شخصين أمام مول العرب: أنا أول ما عديت الطريق بلف أبص على حميدة وعبد العزيز الله يرحمهم - لقيت عربية جات بسرعة جنونية خبطتهم وطيرت كل واحد في ناحيه واستخدمت الفرامل لأني سمعت صوتها جامد بس أنا مسمعتش صوت آلة التنبية والرؤية كانت واضحة لأن الحتة دي فيها عواميد إنارة كتيرة وكانت زحمة لأن الحتة دي دائما زحمة.
