أبرز تصريحات هشام ماجد ببرنامج أسرار: بقف قدام المراية كتير وما بشوفش نفسي حلو
تحدث الفنان هشام ماجد عن مسيرته الفنية إلى جانب حديثه عن مساعدة الفنان أحمد الفيشاوي له ووقوفه بجانبه، إضافة إلى حبه الشديد لشراء الأحذية.
أبرز تصريحات هشام ماجد بـ برنامج أسرار
وقال هشام ماجد في لقائه ببرنامج أسرار تقديم أميرة بدر على شاشة النهار: شهوتي شراء الجزم وساعات بيبقى مالهاش لازمة وعندي حوالي 60 جزمة وحاططهم على الأرض، ومراتي بتضايق من ده.
وأضاف هشام ماجد: بقف في المراية كتير واتأكد اني كويس، مبشوفش نفسي حلو وكتر خير اللي بيشوفني حلو، مبحبش تغيير الشكل والعمليات، الا لو عندك عيب مضايقك أوي، مش زعلان من أحمد فهمي عشان أعاتبه، وهو بيكلمني كتير، وأنا اللي مأثر معاه، وطالع معاه ضيف شرف، وانا عندي فيلم في العيد، اسمه فاصل من اللحظات السعيدة.
إلى جانب ذلك تحدث هشام ماجد عن موقف أحمد الفيشاوي في بدايته مشواره الفني ومساعدته لهم قائلًا: كبريائي منعني أقبل حاجات مش كويسة بفلوس كتيرة أو إني أاسيب منتج عشان أروح لمنتج تاني فلوسه أكتر، والكبرياء شبه العند وأنا برج الثور وساعات أعند عشان مرجعش في كلمتي، وكان زمان الكبرياء تخليني ماعتذرش، لكن دلوقتي كبرت وفهمت، اتأسفت لناس كتير زي مراتي وأمي، وكلمه اسف مش عيب بالعكس بتكبرك.
أحمد الفيشاوي وقف معانا وقفة جدعنة
وتابع: الفيشاويأاكتر حد وقف معانا وقفة جدعنة كنا لسه مش معروفين وهو كان نجم أوي ساعتها وما زال نجم، وافق على كل حاجة مقابل أنه يقف جنبنا، وشايل له ده جدًا، وهو مش مظلوم فنيًا لأنه بيعمل أفلام كتير ممكن يكون ناقصة يعمل مسلسلات.
على جانب آخر، علق الفنان هشام ماجد على أقاويل أمير مرتضى منصور على صفقات الزمالك قائلًا: أمير مرتضى بيهزر وأحمد مدبولي أنا قلتله كويس، لكن الصفقات مبتتعملش كده، وفي الفترة دي جابوا لاعيبة كويسة، عبدالله السعيد لاعيب كويس وكان ناقص الزمالك، وبحب فتوح وزيزو ومثلوثي.
وأضاف هشام ماجد: أتمنى أشوف عبد المنعم في الزمالك ومروان عطية وعلى معلول وإمام عاشور والشناوي، وبشجع الزمالك وبحترم الأهلي، وبحب اتفرج على مدحت شلبي ورضا عبدالعال وميدو وشوبير وابراهيم فايق وعبد الجواد، بحب السينما والكورة لكن مبفهمش في السياسة، وأكتر حاجة بحبها بناتي وعيلتي، وبعدهم شغلي.
