البلوجر جون ملاك صاحب فيديو جدته: تيتا بتحوشلي مصروفي عشان بسافر للجامعة | بث مباشر

أثار البلوجر جون ملاك حالة من الإعجاب الشديد بين متابعيه عبر حسابه على منصة تيك توك، وذلك بعد نشره فيديو وثق خلاله لحظة إعطاء جدته له مبلغًا ماليًا صغيرًا باعتباره مصروفه خلال يومه الدراسي.

البلوجر جون ملاك وجدته

وقال البلوجر جون ملاك إنه أنشأ حسابًا على منصة تيك توك منذ فترة كبيرة، وكان ينشر عدد من الفيديوهات من حياته اليومية.

وتابع: الفيديو بتاع تيتا وهي بتديني المصروف بتاعي حسيت إني عاوز أنزله عشان الناس تفهم إن المحبة مش بالحاجات الكبيرة.. وأنا كنت مصور الفيديو من ورا تيتا من غير ما تعرف وحقق 20 مليون مشاهدة.

وأضاف البلوجر جون ملاك أنه سجل هذا الفيديو يوم عيد الأم، حيث أنه فوجئ بجدته تخرج شيئًا من الدولاب الخاص بها، وعلى الفور قرر أن يسجل هذه اللحظة، قائلًا: تيتا دايمًا بتدينا بونبوني وحاجات حلوة فقولت أصور بسرعة.

وتابع قائلا: تيتا بتحوشلي مصروفي وبتديهولي عشان أنا بسافر للجامعة بتاعتي وبقعد في السكن.. وبتعمل نفس الكلام مع باقي الأحفاد عشان تبسطنا.

وفي السياق ذاته، قالت جدة البلوجر جون ملاك: أنا بحب أحفادي كلهم ومعنديش فرق بينهم.. لازم أحبهم كلهم وبدعيلهم إن ربنا يوفقهم ويسترها معاهم مدى الحياة.. ولحد آخر يوم في عمري هعمل الواجب اللي عليا معاهم.