مؤلف مسلسل خالد نور وولده نور خالد: اخترنا الاسم لـ لخبطة الجمهور.. ومقارنته بـ أشغال شقة مش صح
كشف أحمد عبد الوهاب، مؤلف مسلسل خالد نور وولده نور خالد، الهدف من تسمية العمل بهذا الاسم المختلف، كما تحدث عن التعاون مع الفنانين كريم محمود عبد العزيز وشيكو.
وقال أحمد عبد الوهاب خلال تصريحاته لـ القاهرة 24: حبينا نختار اسم مميز للمسلسل، غير أسماء مسلسلات رمضان، وده لأن الفكرة نفسها مميزة إن شيكو يطلع ابن كريم، الموضوع غريب فقولنا لازم الاسم كمان يكون غريب، إحنا حابين إن الناس تتلخبط.
وأضاف أحمد عبد الوهاب: ده مش أول تعاون بيني وبين كريم محمود عبد العزيز، بنحب بعض جدا وفاهمين بعض، واتبسطت جدا في الشغل مع شيكو، ومركز في كل تفصيلة، وطبعا الإفيهات مكتوبة لكن كل واحد فيهم بيقوله بطريقته، وكانوا أحيانا بيضيفوا بعض الإفيهات بس مش بيخرجوا برا سياق الدراما.
أحمد عبد الوهاب: المقارنة بين أشغال شقة وخالد نور وولده نور خالد مش صح
وعن مشاركة أحمد عبد الوهاب في مسلسل أشغال شقة بطولة هشام ماجد، كممثل، وفي خالد نور وولده نور خالد كمؤلف، علق على مقارنة الجمهور للعملين قائلا: المقارنة بين أشغال شقة وخالد نور وولده نور خالد مش صح، لأن بالرغم من الاتنين كوميدي لكن ده كوميدي اجتماعي، والتاني مبني على فكرة غريبة شوية، لكن طبعا الناس بتتكلم على فكرة إن شيكو وهشام كل واحد بعمل لوحده السنادي.
مسلسل خالد نور وولده نور خالد
يعرض حاليا مسلسل خالد نور وولده نور خالد، على مدار النصف الثاني من موسم رمضان، ويشارك في بطولة العمل كل من الفنان كريم محمود عبد العزيز، شيكو، آية سماحة، شريف رمزي، وغيرهم، والعمل من إخراج محمد أمين.
