بهجت عدلي: الفن بيخليك تحتاج.. ومراتي بتصرف على البيت لما بيكون مفيش شغل
تحدث الفنان بهجت عدلي، عن دور نقابة المهن التمثيلية في تشغيل الفنانين، مؤكدا أنه لا يمتلك أي مصدر للدخل سوى الفن، وأن زوجته تنفق على المنزل وأبنائهم في فترة مكوثه في المنزل.
بهجت عدلي: الفن ملوش أمان
قال بهجت عدلي، في تصريحات تلفزيونية: الفن مالوش أمان بمعنى أن الفن يخليك تعوز وتحتاج، أصل ده بمزاجك ومحدش غصب عليك أنك تدخل الفن، والنقابة مبتشغلش حد، أشرف زكي بيعمل حاجات تانية يشكر عليها.
وتابع بهجت عدلي: إحنا كجمعية عمومية مش عايزين غير أن النقابة تطلب القانون والشركات تشغل 10 %، ولكن في شلالية موجودة ومجموعات كتير، ولو النقابة تقول مفيش أكتر من 10 % كله هيشتغل، والقانون مبتطبقش.
واستكمل بهجت عدلي: دكتور أشرف زكي بيعمل كاستينج وبيروج للممثلين تاني، في ناس قاعدة في بيوتها مش لاقية تاكل وهما أعضاء نقابة، أنا ملجأتش لـ أشرف زكي في الوقت اللي مكنتش بشتغل فيه لأني مبحبش ده، ولكن كنت بكلم المنتجين الكبار.
وأضاف بهجت عدلي: رفضت أدوار كتير على الرغم من الحاجة المادية، لأن الأدوار مكنتش مناسبة ليا، وفي منهم دور في مسلسل معروف وكنت في أشد الاحتياج، واتوعدت أني هشتغل في العتاولة، والمخرج تامر نادي وعدني أشتغل في مسلسل صلة رحم، ومشتغلتش فيهم، ونفسي أعمل دور قاضي فاسد.
بهجت عدلي: بمرض لما ممثلش
أكد بهجت عدلي، أنه لا يمتلك أي مصدر للدخل سوى الفن، وأن زوجته تنفق على المنزل وأبنائهم في فترة مكوثه في المنزل، معلقا: أوقات كتير بيكون مفيش فلوس في البيت، ولما مبشتغلش المدام بتصرف على البيت، وبنساعد بعض والحياة كده هنعمل إيه وهشتغل إيه.
وأصل بهجت عدلي: الجيل دلوقتي غير زمان، جيل دلوقتي ربنا يزيدهم عندهم مطاعم وكافيهات اللي تغنيهم عن الفن، لكن إحنا اللي معملناش ده ومحوشناش فلوس، ويمكن علشان وقتها فلوسنا كانت قليلة.
