إيناس الدغيدي لـ أميرة بدر: رفضت أحمد عز أول مرة لأنه مش مناسب سنًا.. ويسرا اختارته عشان يبوسها
علقت المخرجة إيناس الدغيدي على طريقة اختيارها للممثلين، وسبب رفضها لـ أحمد عز في البداية بفيلم كلام الليل وسبب اختيار يسرا له.
وقالت إيناس الدغيدي خلال برنامج أسرار مع أميرة بدر على قناة النهار: مش مغرورة لكن شكلي مغرور، وعمرو سعد مكسرش المكتب عندي، هو حد كلمني قالي فيه ولد كويس أوي هيجيلك المكتب عشان عايز يمثل، وأنا مكنتش موجودة، ومكلمنيش قبلها، وقال للسكرتيرة أنا مش همشي وقاعد استنى، فاكر أنها مخبياني عنه، وهو كتب لي جواب، بس عرفت الموضوع ده بعد ما بقى عمرو سعد.
وأضافت إيناس: بقابل في اليوم 40 واحد عايزين يمثلوا، واخترت أحمد عز من كاست وكان موديل إعلانات، رفضته في الأول، عشان مكنش مناسب سنًا، عشان كان أصغر من يسرا ومش هينفع، الفيلم كان فيه بوسة، ويسرا جات قالتلي مين الراجل اللي هيبوسني، قلتلها جايبالك واحد كويس، عشان مش عايزة تتباس من أي حد، لما شافته قالتلي هو ده اللي اخترتيه، طب أنتي بصيتي على سنانه، مش هينفع أبوسه عشان سنانه كلها سودة.
واختتمت إيناس حديثها: المنتج كان مقتنع بـ أحمد عز عشان وسامته، وراح قال ليسرا فيه واحد كويس أوي بس إيناس شايفة أنه صغير، لما شافته قالتلي ده أنا هبوسه لكن اللي إنتي مختاراه مش هينفع، قلتلها ده صغير، قالتلي ماليش دعوة، وعمل الدور حلو جدًا، والبوسة طلعت حلوة، وبعدها راح اتعلم وجالي قالي عايز أعمل فيلم، عملت به مذكرات مراهقة، وعز تطور جدًا، ومجتهد ومركز وعنده هدف.
برنامج أسرار
برنامج أسرار تقدمه الإعلامية أميرة بدر على شاشة النهار يوميًا خلال شهر رمضان، في الساعة التاسعة والنصف مساءً، تستضيف من خلاله عدد من نجوم الفن والرياضة والسياسة في مصر.
