واقعة متكررة.. طلاب طب الأسنان بجامعة 6 أكتوبر يروون تفاصيل تعرضهم للسرقة: الأدوات غالية ومش سهل نشتريها تاني
استغاث عدد من طلاب الفرقة الرابعة بكلية طب لأسنان بجامعة 6 أكتوبر، من تكرار تعرضهم لسرقة الأدوات الدراسية والماتريال الخاصة بهم بشكل أسبوعي، من داخل لوكر الجامعة.
ونشر أحد طلاب الفرقة الرابعة بكلية طب الأسنان بجامعة 6 أكتوبر، منشورًا له عبر أحد الجروبات بموقع التواصل الاجتماعي فيسبوك، يستغيث من خلاله بعد تعرضه لسرقة الأدوات التي تبلغ تكلفتها ألاف الجنيهات، حيث قال: عايزين نعرف إزاي جامعة محترمة زي دي، كل أسبوع يحصل فيها عملية سرقة واضحة وصريحة للماتريال بتاعنا، اللي بيوصل لـ 30 و40 ألف جنيه، وإزاي مفيش كاميرات موجودة تجيب السارق؟.
تفاصيل سرقة طلاب جامعة 6 أكتوبر
وتواصل القاهرة 24، مع عدد من الطلبة المتضررين، وقالت الطالبة ن. أ، الطالبة بالفرقة الرابعة بكلية طب الأسنان جامعة 6 أكتوبر، أنا وزميلتي وزمايلنا كتير اتكسر اللوكر بتاعهم، واحنا عياداتنا شغالة وانهاردة كان عندنا عيادة للأسف بس مش عارفين نعمل إيه.
وتابعت الطالبة ن. أ، في تصريحات خاصة لـ القاهرة 24: إحنا اللوكر بتاعنا شايلين فيه كل أدواتنا اللي بندخل بها العيادات ونشتغل بهاء، وهى أجهزة غالية جدا، ومش من السهل نجيبها تاني للأسف، وإحنا مركبين قفل كمبيوتر مش قفل عادى لكن هما كسروا المكان اللي بيدخل فيه القفل، وفاتحين بوكس بوكس واخدين كل حاجة غالية منه، يعنى واخدين الأمان لدرجة إنه يفتح بوكس بوكس، وفي بوكسات مكسرة مش مفتوحة، ومتاخد كل حاجة.
وأضافت الطالبة: مش بس إحنا، أنا معايا زمايلى تانين واخد كل حاجة بالبوكسات كمان، ودا مش أول مرة يحصل، ومفيش حد بيساعدنا ناخد أبسط حقوقنا، وحتى الزملاء اللي اتخرجوا وفي امتياز تعرضوا لنفس الواقعة.
وتابعت طالبة جامعة 6 أكتوبر: أنا اتسرق مني كونترا high speed ب 4000 جنيه، وContra low speed ب 11000 جنيه، وLigh cure ب 3200جنيه.
وقال الطالب ع. ع، الطالب بالفرقة الرابعة بكلية الأسنان جامعة 6 أكتوبر: أنا صحيت على موضوع سرقة الأدوات من الجامعة واتبعتلي فيديو للوكر بتاعي وهو مكسور، وأنا ساكن بعيد عن الجامعة روحت المشوار مخصوص علشان الحق اللي يتلحق.
وتابع: لقيت حاجات بقيمة 6000 جنيه مسروقة، ده أكيد غير الحاجات الصغيرة اللي اتسرقت لأن اللوكر بيكون فيه أدوات كتير جدًا، إنما الحاجتين الأساسيين اللي هما بـ٦ آلاف علشان أجهزة كبيرة سهل ملاحظتهم.
وتابع طالب جامعة 6 أكتوبر: كان في واحد من الأمن واقف قولتله طب والعمل إيه في الحاجات اللي اتسرقت، ورد عليا بكل برود وقالي أنا مالي، والواقعة متكررة على مدار السنين اللي فاتت، ودائما الي بيتعرضوا لواقعة سرقة الأدوات هما فرقة رابعة، والموضوع زاد عن حده بزيادة.
