هدي الإتربي تكشف مواصفات فتى أحلامها
كشفت الفنانة هدى الإتربي، مواصفات فتى أحلامها، مؤكدة أنه يجب أن يكون شخصية ناجحة تتقبل عيوب شخصيتها.
هدي الإتربي تكشف مواصفات فتى أحلامها
وقالت هدى الإتربي، خلال ندوة تكريمها بالقاهرة 24: أنا لو مبحبش الشخص اللي قدامي مش هعرف أبقى معاه، والحب فيه علاقات الصداقة، والحب مبيخلكيش تفكري بعقلك شوية، ولكن بنوصل لمرحلة من النضج في وقت معين، وبنفهم إن الحب لوحده مش كفاية حتى في الصداقة وكل العلاقات، ولكن الحب مهم جدًا بالنسبة ليا في كل العلاقات.
مواصفات فتى أحلام هدى الإتربي
وأردفت هدى الإتربي، كاشفة مواصفات فتى أحلامها، قائلة: لازم يكون بيحبني جدًا وأنا بحبه، ويكون إنسان ناجح وشخص عاقل جدًا ويعرف يحتويني، ويحب فيا الوحش قبل الحلو، يبقى هو الشخص اللي لما يكون عندي أي حاجة أجري عليه ويسمعني حتى لو مش هيحلها، ويقول رأيه الصح حتى لو مندفعة.
هدى الإتربي ترد على انتقادات ملابسها في مسلسل العتاولة
كما ردت الفنانة هدى الإتربي، على انتقادات ملابسها في مسلسل العتاولة، قائلة: مكنتش خايفة من انتقادات لبسي في العتاولة، لأن الشخصية ليها شكل ودوافع، والبنت دي بتحاول طول الوقت تحقق أهدافها بأبسط الطرق وهي إنها تستخدم الرجالة، والنوع ده من البنات دايمًا طول الوقت بيبرز جماله وشكله وتستخدم أدواتها كـ ست علشان تأثر على الراجل وتجنده علشان تعمل اللي هي عايزاه.
وأضافت هدى الإتربي: ده كان الإطار والدوافع بتاع شخصية دينا، لو ترجمنا ده على شكلها لازم تبقى بتلبس لبس بشكل معين والميك آب هيكون شكله معين، فأنا مخوفتش من ده لأن القائمين على العمل عارفين هما بيعملوا إيه كويس، وكل اللي كان قالقني إن أنا أبقى مطلعة الشخصية وأبقى عند حسن ظن الناس اللي وثقت فيا وادتني شخصية زي دينا، ده كل اللي كان فارق معايا.
هدى الإتربي في مسلسل العتاولة
ومن ناحية أخرى، حققت الفنانة هدى الإتربي، نجاحًا كبيرًا في مسلسل العتاولة بشخصية دينا، والعمل من بطولة: أحمد السقا، طارق لطفي، باسم سمرة، مي كساب، حنان يوسف، زينة، والعمل من تأليف هشام هلال، وإخراج أحمد خالد موسى، وعرض خلال السباق الرمضاني عبر شاشة قناة MBC مصر.
