الشناوي: لاعبو الأهلي لا يشبعون من البطولات.. وأزمات الفريق من وحي خيال الصحافة
تحدث محمد الشناوي حارس مرمى الأهلي عن المواجهة المنتظرة للفريق الأحمر أمام الترجي التونسي مساء غد السبت، في إياب الدور النهائي لبطولة دوري أبطال إفريقيا.
تصريحات محمد الشناوي
وفي تصريحات خلال المؤتمر الصحفي علق الشناوي على تصريحات السويسري مارسيل كولر مدرب الأهلي قائلًا: كولر اتكلم عن عنصر مهم وهو الجمهور اللي هيكون في ظهرنا ومتعودين على كدة وخلاص.
وأضاف الشناوي: الشوط الأول في رادس خلص والشوط التاني هنا واللاعيبة جاهزة.. بنلاعب فريق محترم وعاملين لها حساب وإن شاء الله نكسب بكرة ونرفع اللقب.
وواصل حارس مرمى الأهلي قائلًا: النادي الأهلي الفترة اللي فاتت متواجد عطول وأي بطولة بناخدها بنحطها ورا ضهرنا وبنركز في اللي بعدها والأهلي متعود على طول على البطولات.
وعن وجود اعتراضات من بعض لاعبي الأهلي تجاه الجهاز الفني بسبب استبدالهم في المباريات علق الشناوي قائلًا: مفيش أي مشاكل.. الصحف المصرية دائما هي اللي بتعمل مشاكل.
وأردف الشناوي قائلًا: بنلعب البطولات اللي فاتت وإحنا نادي القرن وعندنا جمهور كبير جدًا وعايزين نفرحه ونجيب بطولات عشان النادي والجمهور وأي بطولة بندخلها بتكون دي أول بطولة وبنحترم كل الفرق والمنافسين ودي الميزة بتاعتنا وعشان كدة ده سيستم النادي وبقالي كتير في النادي، وكل بطولة بيكون هدفي التتويج ومفيش حاجة اسمها تشبع بالبطولات عند لاعبي الأهلي، ودا اللي موجود على طول في الأهلي.
واختتم الشناوي حديثه بالتعليق على أداء زميله مصطفى شوبير وكذلك حارس الترجي قائلًا: مصطفى شوبير وحارس الترجي عاملين مباريات قوية جدًا وشوبير وصل للمباراة الـ7 التوالي بدون استقبال أهداف، وحارس الترجي وصل لـ11 مباراة بدون استقبال أهداف وأتمنى لهما التوفيق بكرة والبطولة لينا إن شاء الله.
