انتقد طريقة قبول طفله بالمدرسة.. فردت المديرة: كان نفسنا نطلع ابنك راجل (صور)
قال مينا رامي ولى امر أنه أخذ ابنه للالتحاق بحضانة مدرسة “الجزويت” ولكنه فوجئ بالاسئلة الموجه لابنه التي لا تناسب سنه والذي لم يتعدى الاربع سنوات.
وأضاف رامي في تدوينه له على صفحته الشخصية بموقع التواصل الاجتماعي فيس بوك، “ابني اترفض في انترفيو المدرسة”
ايوا ابني اللي عندوا ٣ سنين وسبع شهور اللي لسه قالع البامبرز من كام شهر رفضوه في انترفيو المدرسة عشان هو دون المستوي … بيخدوا طفل في السن ده في أوضة لوحده من غير اهلة مع عجوز شمطاء كل هدفها انها تعرف هو اتعلم ايه من ساعة لما كان في رحم امه لحد لما قابل وشها العكر … اسئلة لغوية جبارة وعاوزة تشوف هو بينطق الفرنساوي بالاغ ولا لأ وكانة من مواليد المركز الثقافي الفرنسي … مأساة بكل ما تحمل الكلمة من معني … الولد وهو طالع بتقولنا قدامة هو مدلع ومستواة ضعيف وياريت تشوفولوا حضانة تانية … قدام الولد الكلام ده … واللي يعرف ابني عارف كويس انوا بيلقط الكلام ده كله ويخزنة حتي لو عمل نفسه مش واخد باله … بغض النظر اني حاولت الم الموقف وطلعنا جبنا لعبة كبيرة مكافأة انوا استحمل العبث ده كله ومعيطش ولا اتهز لانوا دكر من صغرة … لكن انا لحد دلوقتي مش مصدق ان انا عرضت ابني لموقف زي ده ولو اني معنديش حل تاني في البلد ديه بس برضوا مش عارف اسامح نفسي … ازاي بتدمروا الأطفال كده يا بهايم … عاوزين الواد يدخل المدرسة عارف ايه بالضبط ولو عارف انتوا دوركم ايه.
انا اسف يا ابني ويمكن لما تكبر تشوف الكلام ده وتعرف اني فخور بيك وبردك علي الجاموسة اللي سألتك ايه الفرق بين الكورة والبالونة وقلتلها الكورة بشوطها برجلي والبلونة بخبطها تطير في الهوا … رد عبقري معجبش الجاموسة لانها كانت متوقعة انك تشرحلها التركيبة التشريحية للاتنين.
بعد ٢٠ سنة من دلوقتي ابني اللي اترفض ده هيبقي واحد من اللي العالم بيتكلموا عليه … لأني ببساطة مومن بيه وطول ما فيا روح هفضل في ضهرة لحد لما اشوفة الحاجة اللي هو عاوزها مش اللي انا عاوزهلوا.
#ابني_دكر
ولم يمضي يومان الا ومديرة المدرسة قامت بالرد على ولى الامر بطريقة غير منضبطة وتتنافى مع كونها مديرة احدى المدارس المسيحية الكبيرة بمصر.
وقالت في ردها على والد الطفل،
اولا اعرفك بنفسي انا بكل فخر خريجة جامعة الجزويت لبنان وجوزي بكل فخر خريج جزويت مصر وابني بكل فخر تلميذ جزويت مصر – تانية ثانوي BAC ومديرة الPCH المهم حضرتك استنيت ليه على قرفنا من يوم Interview لغايه يوم ٨ يوليو عشان تكتب البوست الشهير؟ هوا بعد كل اللي عمالناه بابنك في الinterview كنت مستعد تدخلوا مدرسة الوحوش؟ كان مفروض اول ما شفت الظلم والقهر دا كله تسحب الملف وتجري تنقذ ابنك.
ولا استنيت التنسيق وحبيت تعلق الرفض على شماعة اننا وحشين؟
على فكرة الجزويت مش محتاجة حد يدافع عنها حتى لو في بالبوست خريجين شتمونا مش مهم تاريخ اليسوعيين معروف من الجميع واعمالنا لغاية اليوم تفوق تصورات ناس كتيرة انا بس بعبر عن افكاري الشخصيه.
حضرتك ليك مطلق الحرية انك ما تدخلش ابنك مدرسه الجزويت و تطلعه دكر ذي ما قلت بس نحنا كيسوعيين هدفنا ان طلابنا يطلعوا رجاله مش دكورا والفرق كبير جدا.
على فكرة انا اسفة بجد ان ابن حضرتك ما دخلش الجزويت كانت فرصة نعلموا اذي يبقى راجل.
