من “الباندا” و “السوشيال ميديا”: “انت عايز مننا إيه يا كابتن مدحت؟!”
انتقد مستخدمو مواقع التواصل الاجتماعى، طريقة تعليق الكابتن مدحت شلبى على مباراة مصر وأوغندا.
وطالب مصطفى ظريف على صفحته على فيس بوك من قناة أون سبورت: ” كام ريتويت ومتخلوش مدحت شبلي يعلق تاني؟”
فيما قال محمد فتحى: “اللي كان يسمع ميمي الشربيني بيعلق كان بيتمتع بأستاذ بلاغة بيوصف لوحة فنية مش معلق في ماتش.
وأضاف فتحى “ميمي الشربيني كان بيحضر للتعليق، بيصك مصطلحات جديدة، بيعتبر وصفه علامة مسجلة عشان كده بيتعب على مصطلحاته “بيكنباور ينضم لجمعية أصحاب الكرافتات الشيك”.. “عنقود مهارات يا ابني حوالين رجليك” وغيرها من المصطلحات اللي أحيانا كان يكتبها ويقولها كأنه فى حصة إلقاء كإنه على خشبة مسرح.
وتابع “محمود بكر كان بيعتمد على تلقائيته الشديدة ومحاولته كشف طريقة اللعب بعد اول ربع ساعة، فيما بعد عرف الإفيهات اللي بتاكل مع الناس بقى بيكتب مقالات رأي ف تعليقه، كإنه حكاء ماهر بيعزف ع الربابة لناس مستنية هيقول ايه عشان يضحكوا وهما بيتفرحوا ع الماتش.
وأردف، حمادة إمام قصة تانية خالص، تعلب كورة قاري الماتش ليه مصطلحاته اللي ملكيتها الفكرية بإسمه، هاتها م الشبكة يا ابني.. القادمون من الخلف.. وصعب جدا ماتستمتعش بيه.
واستطرد، الواحد لما بيسمع مدحت شلبي النهاردة وهو بينحت ويحزق ويتعب على ما يلاقي اي كلام يعمل منه تباديل وتوافيق عشان يطلع حاجة بإسمه الناس تتفاعل معاها “بيزعل.. بيتضايق” مدحت شلبي مع كامل احترامي بقى بينحت، مفيش ابداع ولا تحضير ولا احترام، فيه نمرة بتتعمل على المسرح عشان الناس تصقف.
وختم فتحى حديثه قائلا “مش مبسوط خالص باللي سمعته، ولا مبسوط بمستوى التعليق اللي موجود دلوقت، وماينفعش يعيش على أمجاد بيبو وبشير وبيبو والجون لان الماتش ده فات عليه بالمناسبة اكتر من 15 سنة”
من جانبه علق أحمد سعيد على صفحته قائلا: “مدحت شلبى أسوأ ما فى المشهد”.
