أبرزهم زيارة فجائية يوميًا على مدرسة.. 12 مطلب لأولياء الأمور من وزير التعليم
أصدرت سوزي معذي، أحد عضوات جروب “ثورة أمهات مصر على المناهج التعليمة”، بيانًا، يحمل عددًا من مطالب أولياء الأمور لوزير التربية والتعليم، على رأسها حل أزمة الدروس الخصوصية، مع مراعاة عودة دور المدرس الريادي، وعودة الطالب للمدرسة.
ونستعرض مطالب أولياء الأمور، التي رصدتها “سوزي” في بيانها المقدم للدكتور طارق شوقي وزير التربية والتعليم:
1- عايزين ميدتيرم منتهى بمواد وليس بنصف منهج إلا للغة العربية لإن فروعها كثير.
2- عايزين نظام علمى وأدبى فقط.
3- عايزين مكتب تنسيق.
4- عايزين مدرسين ثانوية عامة يتاخذ حضورهم ببصمة الإيد فى كل حصة، عندهم على باب الفصل عشان الأولاد تروح وتقفل حضرتك السناتر براحتك وتعمل غياب على النت للطالب براحتك، وإحنا مش عايزين ندفع دروس بصراحة وهندعيلك لما يرجع المدرس المدرسة والطالب وكل واحد يقوم بعمله بضمير.
5- عايزين متابعة ميدانية من حضرتك فوجائية كل يوم على مدرسة، قول نازل مدرسة كذا، وروح بيهم على مدرسة تانية، لما تعمل ده كذا مرة كل المدارس هتتضبط عشان حتى اللى تحت إيدك بما فيهم السواق ميبقاش عارف حضرتك رايح مدرسة إيه.
6- عايزين ندفع المصاريف بالمدرسة لسهولة وتقليل الضغط والطوابير فى البوستات.
7- عايزين ورق التحويلات يطلع كله بطلب واحد ندفع قيمه التحويلات المطلوبة كلها مرة واحدة من غير طوابير، مثال اللى في سنه 5 محتاج تدرج “كى جي” وتدرج لحد 4 ابتدائي وبيان نجاح سنة 5، وندفع رسوم كل ده مرة واحدة عند تقديم الطلب ونستلم بعد يومين، وبالإدارات يطلعوا الحاجات ده ويسلمونا البيانات المطلوبة.
8- بالنسبه الاستثناءات: “اللى نقلوا من محافظه لاخر.. اللى حاله وفاه العائل.. اللى عائد من الخارج”، يبقى دول ليهم الأولوية في التحويل للمربع السكنى قبل التحويل من تجريبيات لتجريبيات.
9-يتم تخليص جميع إجراءات التحويلات مرة واحدة، وقبل بدايه العام الدراسي الجديد، ومن الأول حددوا كل مدرسة محتاجة كام طفل في كل فصل.
10- بالنسبه لتخفيض أو الإعفاء من المصروفات يكون معروف وتخلص إجراءاته داخل المدرسة من غير ما نلف فى الدوائر ومتاهات يبقى المتوفى عائله شهادة وفاة الأب تكفى تبقى فى القائل والطالب يأخذ مايثبت أنه معفى.
11- بالنسبه الكثافه بالمدارس بدل متبقى المدرسة فيها لحد ثانوى، نعيد توزيع المدارس مرة أخرى بحيث كل مدرسة تبقى متخصصة فى مرحلة، وبكده فصول إعدادى وثانوى هتنزل لابتدائى واللى مساحتها تسمح تبقى بدل ابتدائى لحد ثانوى تبقى لحد إعدادى والأولاد تتوزع بكثافه أقل على الفصول، وأهم حاجه في النقطة دي هو تحويل فيلات الأولاد من مدرسة لمدرسة تلقائى دون دخول ولى الأمر فى ذلك، إلا إذا هو حب ينقل مدرسة أخرى، ويبقى معروف أن طلبه مدرسه كذا الابتدائية بيتنقلوا على مدرسة كذا الإعداديه عشان مش الأولاد تتنقل في أي مكان.
12- بالنسبه للمناهج ده موضوع عايز تفصيل لوحده، هو والكتب”.
