دبلة جواز
طول عمرى مكنتش بفهم معنى ارتباط الزواج بالدبلة ليه الطرفين يلبسوا دبل !
زمان تبادل خواتم الزواج كان بيبقى مرتبط بمعنى إن كل واحد بيدي التاني أشياء ثمينة و هى الحب و حياة كل طرف تصبح ملك للتاني، و سبب أن خاتم الجواز بيبقى فى الأيد الشمال بيرجع لوجود شريان يمتد منها للقلب مباشرة، وبيطلق عليه من زمان شريان الحب.
بس مش سبب و يقين بردو أن كل واحد منهم هيخلص للتاني، ويسخر حياته و قلبه له هو بس، لكن السؤال يكمن هل الدبلة دى ممكن تبقى إثبات وعلامة للعالم؟، وإن الإنسان ده دخل فى قائمة المتزوجين و أصبح أخيرا سعيد و لقي اللى كان بيدور عليه طول حياته، ولا يمكن تكون الدبلة دى مجرد طوق !
طوق نجاة يغيرك و يخليك أحسن و أفضل و حابب نفسك و دنيتك مع الشريك اللى أخترته أو بتتحول الدبلة لطوق حوالين رقبتك يخنقك يقيدك بسلاسل ويشل حركتك و يجمدك مكانك يمنعك تتحسن وتبقى أفضل، طوق يسلب منك حياتك و عمرك بالتدريج وأنت واقف تتفرج لمجرد أنك وافقت بإرادتك أنك تلبسه.
الدبلة عمرها ما كانت مقياس لدرجة الحب، ومش هى اللى هتسعد وتداوى جروح و تطبطب وقت وحدتك وحزنك، الدبلة مش هي اللى هتسندك وتكون ضهرك ومنحة فى عز محنتك، الدبلة متقدرش تضمنلك تعيش سعيد لآخرعمرك لكن اللى هيضمنلك ده هو الإنسان اللى هيحبك و يشتريك بسعر مليون دبلة.
أعرف ناس متجوزين ولابسين دبل ومش عايشين مبسوطين فى حياتهم مع بعض، وناس تانية مش لابسين دبل أصلا لكن مرتبطين روحانيا وعاطفيا لأقصى درجة تتخيلها، متتخدعش فى شكل الدبلة و تقيم حياتك وشريكك على أساسها.
وأوعى تدخل الدايرة دى غير وأنت متأكد إنها هتكون ليك طوق نجاة يحييك ميموتكش.
