خريجو إعلام جنوب الوادي يتهمون عميدة الكلية بسرقة مشاريع تخرجهم (صور)
”اتسرقنا من الكلية“ هكذا عبر مجموعة من خريجي كلية إعلام جامعة جنوب الوادى، بعدما اكتشفوا بالصدفة البحته مشاركة مشروع تخرجهم في مهرجان نظمه المعهد الدولى العالى للإعلام جامعة الشروق التابع للجامعة البريطانية تحت عنوان “مهرجان الشروق لإبداعات طلاب الإعلام”، دون علمهم ودون الإشارة إليهم من قريب أو بعيد.
الخريجون دشنوا هشتاج مشاريعنا واستنكروا ما قامت به الدكتوره هاله نوفل عميدة كلية الإعلام وتكنولوجيا الاتصال جامعة جنوب الوادى، بالمشاركة في المهرجان بفيلم (-18) مشروعنا بقسم الإذاعة والتليفزيون، وكليب (ذوى الأحلام الثائرة ) والخاص بمجموعة بقسم العلاقات العامة والإعلان، دون احترام حقوقهم الأدبية، ودون دعوتهم- بحسب ما قاله الطلاب.
وعبر الطلاب عن غضبهم وكتب عدد منهم على صفحتهم عبر موقع التواصل الاجتماعي “فيس بوك” قائلين: “تعبنا 3 شهور كاملين عشان نعمل مشروع تخرج عليه القيمة صرفنا من فلوسنا وفلوس أهالينا وسافرنا رايحين جايين فى اماكن ومناطق كتير واتبهدلنا عشان نعمل مشروع يليق بينا لحد كدا عادى جدا ودا الى بيعمله اغلب طلبة إعلام، انما تتفاجئ بعد ما تتخرج أن الكلية بتشارك فى مهرجانات بالمشروع بتاعك بدون علم أى حد من فريق العمل ولا إذن ولا اى احترام لحقوق الملكية دا بقا الى مش عادى خاصة لو ان المشروع دا أخد مركز على مستوى الجمهورية فى مهرجان كبير وفاعليه كبيرة بينظمها المعهد الدولى العالى للإعلام جامعة الشروق تحت عنوان ” مهرجان الشروق لإبداعات طلاب الإعلام.
وتابعوا:“المشاريع اتبعتت وراحت المهرجان واتقيمت وسط مشاريع 36 جامعة وفيلم (-18) حصل على المركز الثالث بالمهرجان، وكليب ( ذوى الأحلام الثائرة ) حصل على المركز الثانى بالمهرجان وطلعت الدكتوره اتكرمت واتصورت واخدت الشهاده والدرع ، ولك ان تتخيل ان وصل الفساد والإهمال وعدم مراعاة حقوق الطلبه اللى تعبت واتبهدلت أن مجاش حتى على بال الكلية انهم يكلمونا يقولونا مبروك لا دا احنا عرفنا بالصدفة من واحد صديقنا كان حاضر المهرجان.. وهنا نسأل سؤال مهم ليه عميده الكلية لما نزلت بوستات ان الجامعه فازت ب 4 مشاريع فى مهرجان الشروق مكتبتش اسماء المشاريع ولا قالت أي معلومة زيادة عن كدا حتى للمواقع الى كتبت عن فوز الكلية ؟.“
وأضافوا:“ طيب دى مش الواقعة الأولى اللى تحصل برضو، السنة الى فاتت زميلنا خالد مصطفى كان فى قسم صحافة وقدم فى مسابقة بمقال عن الإرهاب وكان مكتوب أسمه على المقال واتشال واتكتب كلية الاعلام بس بدل اسمه وبعد مالمسابقة خلصت وعدى عليها وقت نعرف بالصدفة البحته أنه أخد مركز خامس جمهورية وأنهم نسيوا يبلغوه ويقولوا ان مكانش فيها جايزة مادية وبعدين يطلع فى بس 200 جنيه بس ! وكمان مينفعش ياخد الشهادة لان المقال اتقدم باسم الكلية مش باسم خالد مصطفى.“
واستكملوا:“ ملخص كل دا مشاريع التخرج اللى الكلية شاركت فيها من انتاجنا الخاص ومأخدناش جنية واحد من الكلية او من الجامعه اذا مش من حق اى حد يستهبل ويتعدى على ملكيتنا ويقدم بالمشاريع دى من غير إذن مسبق من اصحاب الاعمال دى لان احنا مش قاعدين فى خرابة احنا فى دولة ليها قانون وهناخد حقنا بالقانون، ومعلومه بس لعميد الكلية حضرتك لما طلعتى ع المسرح واتكرمتى واخدتى تحية من الناس الى بتتفرج احنا احق مليون مره بالوقفه دى مش حضرتك خالص وحضرتك طلعتى على مجهودنا وعرقنا والدرع والشهادة الى خدتهم الكلية صناع الفيلم والكليب أحق بيهم وال cv بتاع كل واحد فينا أحق بيهم منبقاش احنا بنعافر فى قنا فى اخر الصعيد فى كلية مبتدعمكش نهائيا عشان نعمل حاجه ننافس بيها وسط اكثر من 100 مشروع ونحقق مركز تانى وتالت على الجمهورية وانتوا تنسبوا الفضل لنفسكم وتضحكوا ضحكه صفرا وتباركوا لبعض.“
وختم الطلاب تدوينتهم قائلين:“ احنا اصحاب الأعمال ومحدش فينا يعرف ومع ذلك الأعمال دخلت المهرجان واخدت مركز والكلية بإدارتها متهمه بالتعدى على حقوق الملكية والقائمين على المهرجان متهمين بالتقصير الفادح .. والمهرجان بيتكلم عن ابداعات الطلاب مش العمداء فابقوا راعوا ان الطلاب دى تكون موجوده اللجنة الإعلامية لمهرجان الشروق لإبداعات طلاب الإعلام.“
هذا ويحتفظ موقع ” القاهرة 24“ بحق الرد للجامعة وإدارة الكلية على ما تم ذكره على لسان الخريجين.
