ردًا على اتهامه بالتجارة بالدين.. أمير منير: للأسف مفيش تعليم ولا معيشة مجانًا
أعلن الدكتور أمير منير الداعية المعروف على صفحات التواصل الاجتماعي، بدء دورات تدريبية للأباء والأبناء لإصلاح علاقات الأجيال القادمة ببعضها البعض.
واتهم البعض منير بأنه يتاجر بالدين ويكسب أموال طائلة من خلال الفيديوهات التي ينشرها على صفحته، حيث نفى حصوله على مقابل مادي كبير وإنما هو مقابل مادي ضعيف لتحسين المحتوى فقط” قائلًا: “ده شغلي ودخلي الل بعتمد عليه في معيشتي وبيتي وتعليمي لو أقدر أقدم كل شيء مجانا فعلا لكن للأسف مفيش تعليم مجانا ولا معيشة مجانا للأسف”.
وأوضح منير في منشور له عبر صفحته الشخصية بموقع التواصل الاجتماعي “فيس بوك”: “عشان أنا بعتبركم كلكم اخواتي وأصحاب فضل عليا بعد ربنا سبحانه وتعالى تعالوا نتكلم”.
وتابع: “أنا أمير منير عندي 35 سنة بدأت أعمل فيديوهات دعوية من 4 سنين وبدأت فيديوهات يومية من 6 شهور ودعواتكم يا طيبين أني أقدر أكمل بإذن الله”.
وأضاف منير: “تاجر ديييييييييين وبيكسب ملايين من الفيديوهات .. الفيديو اليومي اللي حضرتك بتتفرج عليه في دقيقتين تلاته بياخد مني نص يومي تحضير وإعادة ومونتاج سريع وعشان أكسب منه لازم إعلانات اليوتيوب والفيسبوك وأنا قافل الإعلانات في الاتنين عشان لا يليق تتفرج على كلام ربنا وفي النص تلاقي إعلان لا يرضي الله وديه وجهة نظري”.
وأردف: “والفيديوهات ملهاش شركة راعية مثلا والداعمين على باتريون جزاهم الله خيرا الدخل الواصل منهم يدوبك يكفي لتحسين المحتوى. فعشان مضيعش وقتك واختصر دخل الفيديوهات تقريبا لا شيء. أمال بتشتغل داعية ليييييييه .. مفيش شغلانة اسمها داعية الدعوة ديه دورنا كلنا أيا كان المجال اللي شغالين فيه كلنا مسلمين والمفروض كلنا دعاة. يبقى أنت بتشتغل أيه .. أنا شغلي في التدريب والكوتشنج وهو ده رزقي”.
واستطرد منير: “غير مؤهل وشغال بالحب وكل الكلام ده موجود عالنت ببلااااش .. أنا معايا شهادات في التدريب PCT من الجامعة الأمريكية بالقاهرة AUC .. شهادات في التربية والكوتشنج وقريبا في العلاقات الأسرية معتمدة من الاتحاد العالمي للكوتشنج ICF .. شهادات في طرق تقديم المحتوى وغيرها كثير وكلها شهادات قائمة على علم النفس ودراسات علمية وكلها من أماكن مرموقة وليها قيمتها”.
واستكمل: “يعني كلفتك كام يعني .. شهادة الكوتشنج الواحدة على الأقل ب 35 ألف جنيه وفي شهادات وكورسات أغلى من كده .. لك أن تتخيل الشهادات كلها كلفوني كام ولسه هتكلف تاني عشان اتعلم واطلع أقول كلام مفيد ومغير قائم على علم مش أي كلام وخلاص”.
وبين: “كورس ب 3000 جنيه يا حرااااامي .. لو حضرتك متابعني هتعرف أن ليا محاضرات مجانية ومحاضرات كانت ب 30 جنيه اخرها مرتين قبل رمضان عن الاستعداد لرمضان وكانت كلها تكاليف المكان المنظم وأنا مخدتش حاجة وبرضه اتشتمت – 30 جنيه عشان نسمع دين يا راجل يا تيييييييييييت – ومحاضرات ب 200 و ب 400 وكورسات هتبقى أغلى من كده وده حسب المحتوى المقدم وكلفني قد أيه تحضير وهيتقدم في قد أيه هل في ساعتين ولا أيام تدريبة وعدد الحضور وغيرها من التفاصيل”.
وقال أمير منير: “بفلوس يا شيخ بفلوووووس .. ده شغلي ودخلي الل يبعتمد عليه في معيشتي وبيتي وتعليمي لو أقدر أقدم كل شيء مجانا فعلا لكن للأسف مفيش تعليم مجانا ولا معيشة مجانا للأسف. يعني أنت عملت كل ده عشان تجمع متابعين وبعدها تبيع لهم .. هحكيلك أنا فضلت فاصل المتابعين عن شغلي لدرجة وصلت أن شغلي بيقع وحياتي بتضرر من وجود الصفحة والفيديوهات لا عارف أركز في شغلي ولا عارف أعلن عنه عشان خايف على الناس يفكروا زي ما للأسف صاحب السؤال فكر وبقى قدامي اختيارين يا اتعامل عادي وأعلن عن شغلي على صفحتي وبروفايلي زي الناس العاديين يا أما أقلل جدا من دعوتي وقد أنسحب منها وابدأ أركز في شغلي وأعمل منصات جديدة للإعلان عنه والصراحة أنا بحب دعوتي وقررت أعلن عن شغلي عادي لا هو عيب ولا حرام والمهتم بيه هيشترك ويستفيد واللي مش مهتم أنا معاه دعويا مش بس زي الأول لا أكتر الحمد لله والقرار ده الحمد لله ساعدني في دعوتي وشغلي”.
وأكد: “عشان مطولش عليكم وأنا أصلا طولت .. أنا مستمر بإذن الله في دعوتي وشغلي. مهتم بالفيديوهات كل يوم هتلاقي فيديو مستنيك عمري ما هطلب منك قصاده فلوس ولا غيره هطلب بس تدعيلي بالتوفيق. مهتم بالكورسات هتلاقي حاجات مفيدة كتير وبأسعار متفاوتة وبنجتهد نخليها قريبا موجودة أونلاين بأسعار أقل عشان الفائدة تعم بإذن الله. مش مهتم بحاجة من اللي بقدمها .. شايفني تاجر دين ونصاب ومش عارف أيه كمان وحابب تتهمني في ديني ونفسي أرجو من حضرتك أن ده يكون عندك في صفحتك مش هنا أرجوك”.
واختتم: “للأسف ناس كتير بتحب تكسر أي حد حابب يعمل حاجة بتحب تشكك في أي نية بتحب كل الدعاة والمصلحين وأي حد عايز خير أنه يطلع وحش .. بس الحمد لله برضه ناس كتير بتساند وتساعد ولو بكلمة طيبة ودعوة صادقة وليهم بقول ادعوا لي يا طيبين بصلاح النية وإنها تبقى خالصة لله وأني أقدر أكمل.
