متطوعة بتنظيم بطولة أمم إفريقيا تروي وقائع تعدى أحمد مجاهد: “شد بنت من شعرها” (صور)
كشفت إيمان عبد الهادي ، إحدي المتطوعات بتنظيم بطولة كأس الأمم الإفريقية، القصة الكاملة التي أكدت فيها تعدى أحمد مجاهد المنسق العام لبطولة أمم إفريقيا، بالضرب أو السب على إحدى المتطوعات أثناء البطولة.
وعن تعدى أحمد مجاهد نشرت عبد الهادي، صورة لها عبر صفحتها على موقع التواصل الاجتماعي “فيس بوك”، تجمعها مع عدد من المتطوعين والدكتور أشرف صبحي وزير الشباب والرياضة.
وعلقت عليها قائلة:”الصورة دى مش مجرد صورة تذكارية تجمع بين متطوعين فى تنظيم بطولة كأس الأمم الإفريقية ووزير الشباب والرياضة الدكتور “أشرف صبحى” والدكتور “مصطفى عزام” مساعد رئيس اللجنة المنظمة للبطولة ومنسق مباريات ستاد القاهرة ، العميد “إيهاب رجب” و”أحمد لطفى” مسئولين عن متطوعين بروتوكل ستاد القاهرة”.
“القاهرة 24” يكشف تعدي أحمد مجاهد بالضرب والسب على متطوعة في أمم إفريقيا (مستندات)
وأضافت المتطوعة:”فى الحقيقة منعت نفسى أكتر من مرة أنا وزملائى من أننا نكتب حقيقة الصورة وما ورائها على السوشيال ميديا حفاظآ على الصورة العامة لمجهودنا المبذول ومجهود أبطال سهرت أيام علشان خاطر عيون مصر وصورتها أمام العالم”.
وتابعت:”فى إخراج تنظيم بطولة عالمية بتشارك فيها 24 جنسية بصرف النظر أن المنتخب المصرى كمل أو خرج بصرف النظر مين كان مقصر لكن أحنا كمنظمين خارج الدائرة ومكملين شغلنا على أكمل وجهه حتى تنضيف المقصورة بعد إنتهاء كل مبارة وده شئ عمرة ما حسينا انه بيقل مننا بالعكس الاستاد أصبح بيتنا حتى ولو ليوم واحد وواجب علينا الحفاظ عليه، كنا بنعمل اللى ينطلب مننا أو مينطلبش طالما الظرف يحتم ذلك”.
وتابعت:” أنما أننا نتهان وكرامتنا يتقل منها والحقيقة تتزيف فى المواقع الإخبارية هنا stop كل مبارة يحصل موقف مهين ومتعنت ومتعجرف مختلف من عضو مجلس إدارة إتحاد الكورة سابقآ ومنسق عام البطولة معامله غير لائقه بالمرة للجميع وغير مرغوب فى وجودة من الجميع لسوء تعاملة”.
مواقف أحمد مجاهد خلال البطولة
وعرضت إيمان بعض المواقف:”فى مبارة الجزائر ونيجيريا تم تكليفى بالوقوف أمام الصالون الخاص بوزير الشباب والرياضة والمفتاح كان معايا وتم التنبيه عليا من الحرس الخاص بالوزير ممنوع حد يدخل بالفعل تم الأمر على أكمل وجه”.
وأكملت:”الوزير وصل فتحت دخل هو وسفير الجزائر قبل بدء المبارة خرجوا قفلت بالمفتاح وكان معايا وتوجهنا أنا وزملائى للمقصورة وقت السلام الجمهورى عمرى ما كنت اتخيل أن “أحمد أحمد” رئيس الإتحاد الأفريقى هيطلب يصلى فى الوقت ده الباب طبعآ كان مقفول والمفتاح معايا أول ما أنتبهت على الفور توجهت علشان افتحله لقيته فى وشى بيزعق حاولت أمتص غضبه وقولتله “أزى حضرتك الأول المفتاح معايا وهفتح حالآ” كان رد فعله أنه هيكسر أيدى وأنا بفتح وبيفتح هو كمان معايا الباب وأحرجنى جدآ قصاد “أحمد أحمد” مع ذلك عرفته القبله وخرجت وسكت”.
أحمد مجاهد يوضح حقيقة التعدي على “متطوعة ببطولة أمم إفريقيا”
تعدى أحمد مجاهد
وأردفت الموقف الثاني:”كان معدى من باب المقصورة الرئيسية وأول ما شافنا كل حد ملتزم بمكانه قال بصوت عالى “أنتم أسوء ما فى البطولة وبيشاور بصباعه علينا كلنا وكأننا جايين من الشارع مثلآ ميعرفش أن كل بنت وشاب فينا متخرج من أكبر جامعات مصر ومعاه لغة واتنين وC.V يخض”.
الموقف الثالث:”ده كان القشة التى قسمت ظهر البعير أحد المشجعات تونسية الجنسية أخت “خالد المقشر” منسق عام VAR بين الشوطين توجهت للطلوع لاونج الخاص بVipp وتم الطلب مننا أنا نراجع ticket كل الناس قبل طلوعها وليه بقى نسأل الهانم ونقولها من فضلك نشوف ticket بتاعتك نزلت شتيمة فى زميلتنا وتقولها أنتى بنت صغيرة قذرة”، وراحت للبنت اللى بعدها (دارين) تقولها بصوت عالى وأسلوب سيئ أنتم المصريين شحاتين جرابيع ما أنتم فاهمين شئ ولا عارفين تنظموا بطولة”.
واستكملت:”طبعآ هنا شباب تذكرتى منعوها من الطلوع ورفضوا وجودها لانها بتشتم فى بلدنا وهى على أرضها لمجرد أنها رافضه تتبع النظام والمطلوب مننا نعرف أنها اخت منسق حكام تبع CAF من تلقاء نفسنا مثلآ وحتى لو عرفنا ليه نكسر النظام ( دارين ) زميلتنا ولا نطقت بكلمه ظهر أحمد مجاهد أخد الهانم اللى بتغلط فى بلدنا بكل قلة أدب وطلعها تاكل وزعق لزميلتنا قصاد الناس كلها”.
تصرف غير لائق مع فتاة
وقالت:”مع بداية الشوط التانى زميلتنا بتحكى لأحد الظباط الحاضرين المشكلة سمعها شد Id من رقبتها وشد شعرها بشكل هستيرى وزقها بقوة وبعلو صوته قالها أمشى أطلعى بارة مش عايزك هنا بصوت عالى وسط الصاله الكبيرة خلف المقصورة طبعآ الناس اتلمت وزميلتنا اتبهدلت واتهانت جدآ ولانها بنت متربية خريجة الجامعة الكندية أتصدمت من الفعل انا وزميله معانا كنا بنحاول نمشيها من قدامه ونهديها لكنها أنهارت من البكاء وبعد أنتهاء المبارة وانصراف الوزير وضيوفه وصله اللى حصل رجع تانى مشكورآ واجتمع بينا وأعتذرلنا بنفسه وتعهد بأن الموقف مش هيعدى بالساهل وحكينا على كل حاجه بدرت من الشخص ده لأنه لا يستحق أن يتولى أى منصب بعد أستقالته من اتحاد الكورة”.
وتابعت:”طلب الوزير ياخد صورة معانا لأنه فخور بينا وبتجربتنا فى التنظيم ولم يصدر عنا أى شكوى منذ بداية البطولة ودارين هى البنت اللى جنبه ماسكه ID بتاعها فى إيديها بعد ما قطعه، ولم يكتفى الوزير المحترم بذلك أجتمع بينا اليوم فى مكتبه لمناقشه الموضوع وتقديم كل سبل الترضيه لزميلتنا ولينا لأن كرامتنا واحدة”.
تحرير محضر بقسم الشرطة
وأوضحت:”إنه تم تحرير محضر برقم 2306 جنح قسم ثانى مدينة نصر ضده وكلنا شاهدين معاها وحقها هيرجع وأى كلام بيقوله فى الصحافة كدب فى كدب وأخلاقه مع الجميع تشهد عليه أنا حكيت كل كلمة بأمانة أتسأل عليها قصاد ربنا”.
وأستطردت:”الجميل بقى أن الدكتورة “جهاد عامر” هى مسئولة عننا فى إختفاء تام، والأجمل أن الكابتن “محمد فضل” وقت ما أتشحن من أهل الشر قال مش عايزهم وما يجوش اللى هو عددنا فوق 50 متطوع علشان يرضى البيه المحترم ولو فعلآ قعدنا فى بيوتنا فى مبارة وحفل الختام الدنيا هتقع لكن أحنا رايحين وهنكمل شغلنا علشان حاجه واحدة طلعت كبيرة عليهم أوى ومش عارفين قيمتها أسمها مصر”.
