لماذا اقتحم فاروق الفيشاوى حفل تكريم عادل إمام رغم طلب الزعيم منعه من الحضور؟! (صور)

روى الصحفي محمد المعتصم، مدير تحرير جريدة الدستور، موقف جمعه بالفنان الراحل فاروق الفيشاوي، والزعيم عادل إمام منذ سنوات عده، وذلك على حسابه الرسمي بموقع التواصل الإجتماعي”فيس بوك”.

فجاء الموقف كالتالي، حيث قال:”فاروق الفيشاوي، زمان دخل علينا المكتب في جريدة الميدان صديقي المحترم المصور الصحفي حسن عبد الفتاح، وفضل يحكي لنا عن اللي حصل مع عادل إمام في المغرب، والاستقبال الملكي اللي شافه وفي وسط الكلام حكي إن عادل إمام زعلان أنه ما اتكرمش في مصر، الفكرة طلعت في ثانية نعمل تكريم لعادل إمام ونعزم مصر كلها وقد كان”.

أول تعليق من عادل إمام على وفاة فاروق الفيشاوي (صورة)

وتابع:”جريدة الميدان هتعمل تكريم في الأوبرا لعادل إمام، وقتها الأستاذ محمد حسن الألفي رئيس التحرير، كان مهتم جدًا بالموضوع وبيتابع كل كبيره وصغيره الأوبرا اتحجز قاعتها الرئيسية، مجلس الوزراء بالكامل اتعزم، ومعظمهم حضر، أعضاء في مجلس الشعب والشورى، فنانين من مصر وبره مصر وكل الفنانين اللي يخطروا على بالك، رئاسة الجمهورية وحضر مندوب من الرئيس أظنه سكرتيرة، بالإضافة طبعا لأسامة الباز ضيف عليهم كتاب تذكاري عظيم عمله وحيد رأفت واتطبع في كام يوم واتوزع في الحفله”.

وأضاف:”عادل إمام كان بيتابع أدق التفاصيل مع الألفي وكان حريص إنه يعزم ناس من أصحابه القدام سواء في الفن أو غيرهم (شوفت زكي جمعة اللي أتكلم عليه في مدرسة المشاغبين ومصر كلها)، بس كان له طلب وشرط، الطلب كان أن السيدة فاتن حمامة تحضر، والشرط أن 3 أشخاص ما يحضروش، عن نفسي كنت عارف سبب منع اتنين من الأسماء لكن ماكنتش فاهم سبب إستبعاد فاروق الفيشاوي”.

وقال:”لما بدأت الحفلة لقينا الأستاذ فاروق دخل القاعة ويجري، بيجري فعلا، ناحية المسرح كان الموقف مفاجئ، كان لسه محمد منير وأنوشكا مخلصين أغنية بلاد طيبة، عادل إمام كان على المسرح وجنبه الألفي اللي اتكسف وبص لعادل إمام، الفيشاوي مسك الميكروفون وقال إنه بيعتذر عن اقتحام المسرح والحفل رغم أنه مش معزوم، ليرد الألفي حاول يشيل الحرج ويقول: ازاي أكيد غلطة”.

كمال أبو رية: علمت بمرض الفيشاوى قبله وحميدة من أخبره

وتابع: “فرد الفيشاوي وقال:” لا أنا عارف إنها مش غلطة وأني مقصود ما أتعزمش، وأنا ما كنتش هحضر بس ما ينفعش يبقي عادل إمام بيتكرم وأنا ما أحضرش الحفله وأحتفي بيه، وسط الناس لأن عادل إمام حاجة كبيرة في الفن، هنا عادل إمام مد إيده واخده بالحضن وانتهي الزعل والقطيعة”.

وأختتم:”بعدها قابلت الأستاذ فاروق الفيشاوي كذا مرة مع الصديق يوسف معاطي، لما كان بيشتغل على مسلسل “أدهم وزينات” شوفت فيه طيبة وجدعنه وشقاوة وخفة دم ومواقف مع أصحابه ومع الناس اللي بتشتغل معاه بتقول إنه ابن بلد مجدع، ربنا يرحمك يا أستاذ فاروق”.

وشيعت ظهر اليوم، جنازة الفنان فاروق الفيشاوي، من مسجد مصطفى محمود بالمهندسين، حيث تم دفنه بمقابر العائلة في مركز سرس الليان محافظة المنوفية، ومن المقرر إقامة العزاء يوم الأحد المقبل، بمسجد الشرطة في الشيخ زايد.