أكرم حسني يتعاقد على فيلم جديد من إخراج شريف عرفة (صورة)
تعاقد النجم أكرم حسني، على فيلم جديد من إخراج المخرج الكبير شريف عرفة، وأعلن ذلك عبر حسابه الرسمي بموقع “انستجرام”.
ونشر حسني، صورة له مع عرفة أثناء تعاقدهم على العمل، وروى للجمهور ذكرياته مع المخرج، فقال: “سنة 1992، كنت طالب في سنة أولى كلية الشرطة، و كان في فترة التدريب الأساسي ( 45 يوم مابنخرجش من الكلية)، مخصصين يوم في الأسبوع بعد إنتهاء زيارة الأهالي للطلبة لمشاهدة فيلم سينمائي، في أحد مدرجات الكلية للترفيه عن الطلبة”.
وأضاف: “و طبعا ده كان جايلي عالطبطاب لأني بحب السينما من صغري.. أول يوم عرض كان فيلم ” الإرهاب و الكباب ” إخراج الأستاذ الكبير، شريف عرفه و عمري، ما هانسي الخطفة اللي اتخطفتها يومها، من الفيلم و تأثيره عليا و إزاي قدر الأستاذ شريف كمخرج عبقري إنه يوصل لي الإحساس ده و الانبهار ده بكل عناصر الفيلم”.
وتابع: “و من وقتها بدأت اركز مع السينما و أتناولها بمفهوم تاني، و طبعا كان من رابع المستحيلات وقتها أني أتخيل أي شئ ممكن يربطني بهذا المخرج العبقري ( أصل أيه اللي هايربط ظابط بمخرج غير أني أشوفه في لجنة أو كمين و أعبرله عن إعجابي بيه !!)”.
وأختتم: “النهاردة بعد مرور 27 سنة من الحكاية دي و بعد مشوار طويل من التحديات و المجهود أحب أبلغكم و أنا كلي شرف و فخر أني وقعت فيلم من إخراج الأستاذ، شريف عرفه لسنة 2020 .. دعواتكم أني أكون قد المسئولية”.
