خطف البنات وسافر.. أم تستغيث لاستعادة طفلتيها من طليقها بعد هروبه للفلبين (صور)
تقدمت المواطنة آية ممدوح، ببلاغ رقم ٥٣٤٧ إداري المقطم بخصوص سفر زوجها بابنتيها الاثنين بدون موافقتها وذلك بالتواطؤ مع اخته، وهرب بهما للفلبين .
ونشرت آية عبر مجموعة “الأمهات المعيلات” والمعروف بتبني قضايا الأمهات المعيلات بكافة فئاتهم، أكدت فيها أنها مطلقة منذ حوالي 3 سنوات، وحاصلة على حكم نهائي بحقها في الشقة والعفش وغيره من المستحقات، إلا انها آثرت عدم إحداث مشاكل وعدم تنفيذ الحكم، حفاظا على هيبة الأب أمام بناته .
ونشرت آية تدوينة قالت فيها:” أندلس وفيروز من يومين بالضبط كانوا معايا منفصلة عن بباهم من أكتر من ٣ سنين عمري ما اتكلمت عن انفصالي ولا حياتي الشخصية ٣ سنين أهلي وانا متكفلين تماما بالبنات نفقة ومسكن ومدارس رفض كل محاولات الالتزام الكتابي بأي شيء (عاوز يتفق شفوي بالكلام كدة وبس).
وأضافت آية :” رفض إني آخد عفشي وحاجزه في شقة مقفولة رفض أفضل في شقتي رغم حكم المحكمة وفضاها من العفش وكنت أقدر أقيم فيها بس منعا للمشاكل رفضت اسكن بدون موافقة أهله لأنها قدامهم رفض دفع المصاريف المدرسية وصدرت أحكام نهائية ضده وبرضو مدفعش رغم أننا اكتر من مرة طلبنا يدفع ولو جزء واحنا نكمل الباقي مفيش أي نفقات شهرية طبيعي بعد ٣ سنين إني أتعب وأشتكي المسوولية بتزيد جدا عليا ومش دور أهلي افضل ضاغطاهم بمصاريف ولادي ومش طبيعي البنات يعيشوا في اوضة في بيت جدتهم طول حياتهم وهما لهم بيت واهل بباهم ميسورين جدا”.
وأكملت :” كل الناس بتتطلق حدث يومي عادي جدا وبنسمع مليون شكوى من آباء مقصرين في جزء من مسئوليتهم مشفتش أبدا حد مبيدفعش ولا جنيه مش عاوز يتحمل ولا أي حاجة مش هكتب ورق ومفيش ضمانات وورونا المحاكم هتجيب لكم ايه رغم دة كله عمري ما منعته ولا هو ولا اهله يشوفوهم اي وقت وسفر وبيات وكل حاجة ولادي يتاخدوا مني غدر ليه؟.
وأردفت :”أنا اللي مودياهم لعمتهم بنفسي اتاخدوا عشان يتضغط عليا اني اتنازل عن حقوقهم زي ما اتنازلت عن حقوقي وعملت خلع ميفضلوش معايا ليه ويبقى لنا بيت ونفقة زي أي ناس طبيعية ياخدهم بالتواطؤ مع اهله ويدعوا اني مش عاوزاهم ويسافروا لاخر الدنيا بالهدوم اللي عليهم من غير حتى ما اسلم عليهم انا مش مصدقة لحد دلوقتي باسبورات البنات معاه ومفكرتش اعمل لهم منع احترازي من السفر”.
وأشارت:”وعمري ما كنت فكرت ما كنت هتخيل ان حد يهون عليه ياخدهم مني فجاة بالشكل دة ويقول اني مش عاوزاهم ومدارسهم كمان اسبوع وورق المدارس وكل حاجة هنا انا عاوزة بناتي قلبي محروق عليهم مش هعيش من غيرهم وعاوزة حقهم الطبيعي في ان ابوهم ينفق عليهم ويلتزم بدة قدام القانون وقدام ربنا مش هسيب طريقة اخدهم بيها لان حقهم يتربوا في حضن أمهم ويتعلموا ويكون لهم بيت وحياة طبيعية”.
وكشفت:” بناتي حاليا في الفلبين مع بباهم معرفش أي حاجة عن ظروف حياتهم ولا هيعيشوا ازاي ومع مين ويتعلموا ازاي مفيش أي مبرر في الدنيا لتصرف زي دة ادعولي وادعوا لهم ربنا يهون عليهم ويجمعني بيهم ويردهم لي سالمين ويبرد قلبي عليهم”.
