خالد الغندور مهاجمًا سيد عبدالحفيظ: “هو أنت لما تشتمني هسكت يعني” (فيديو)

هاجم الإعلامي خالد الغندور، مقدم برنامج الزمالك اليوم المذاع عبر قناة “الحدث اليوم”، الكابتن سيد عبد الحفيظ مدير الكرة في النادي الأهلي.

قال الغندور :” أحنا اخدنا أكتر من عشر سنين، والزمالك بتسلخ على قناة الأهلى، ولما كنت برد بالمنطق على قناة دريم، كان الكباتن بيقولوا عليا هو خالد الغندور منحاز لنادي الزمالك، طيب هو الأهلي ليه محدش بيشتمه، أنا نفسي “خالد الغندور” اتسلخت كتير جدا على قناة الأهلي”.

وأضاف الغندور: ” يا كابتن سيد، أنا بواجه أهو وبقول اسمك، مش زيك لما تتكلم بطريقة مدارية، نسيب الكلام دا للسوشيال ميديا، وانا بقولك أهو بأسمك”.

وانفعل الغندور على الهواء مباشرة في حلقة الأمس، بعد ترديد مقولة “ميكروباص المحور” في الإشارة إلى برنامج الزمالك اليوم، بعد إلغاء تعاقد قناة المحور، وإذاعة الحلقات عبر قناة الحدث اليوم، موجها حديثه إلى مدير الكرة بالنادي الأهلي: ” هو أنت يا سيد عبدالحفيظ، عاوز تهيني وأنا أسكت، أحنا بنقبض من رئيس النادي ونطبل له، وأنت بتحب النادي الأهلي قوي يعني، ومحاربتش عشان تفضل في موقعك كمدير للكرة في النادي الأهلي، أنا بقول أهو جمهور الأهلي جمهور عظيم والنادي الأهلي فريق كبير”.

وأردف: ” هو لاسارتي ليه ممشيش بعد 5 صفر في صن دوان، وهو مشي عشان اتغلب من بيراميدز ولا عشان طلع في المؤتمر قال إن مجلس الإدارة ما وفرش لعيبة وجاب لاعيبة من غير ما يقولولي، عمر رئيس الزمالك ما طلع شتم في النادي الأهلي ولا أتكلم على جمهوره بالعكس ده بيقول إن النادي وجماهيره ناس محترمة جدا”