سائق قطار: “خايفين نركب الجرارات لنخش السجن زي الكمسري.. والمسؤولين قاعدين في التكييف”
قال محروس الوصيفي، قائد قطار 333 “القاهرة – الزقازيق”، إن سائقي القطارات يعيشون في حالة من الغضب والرعب المستمر نتيجة نزول بعض الركاب من على رصيف المحطة إلى قضبان السكة الحديد، مما يعرضهم للموت في أي لحظة، ما اضطرهم لمناشدة إدارة المحطة وهيئة السكة الحديد لإبلاغ الركاب ولكن دون جدوى.
وأضاف الوصيفي في تصريحات خاصة لـ “القاهرة 24″، أنه قام بتصوير فيديو أثناء دخوله محطة الزقازيق للركاب أثناء نزولهم على القضبان وقام بنشره لمناشدة المسؤولين، قائلًا: “احنا مالناش ذنب حد يموت ونروح النيابة ونتحبس، صورت الفيديو عشان الناس اللي بتودينا النيابة بدون وجه حق، احنا مالناش ذنب في أي حاجة بتحصل، ذنبنا إيه؟.. أنت شايفني وأنا داخل على الرصيف”.
وأوضح: “الركاب بتنزل على القضبان وبيقفوا قدام السواق، بتبقى أعصابنا سايبة واحنا داخلين المحطة، وقبضوا على زمايلنا قبل كده، ونشرت الفيديو ونفسي الناس ترحمنا من اللي احنا فيه، الهيئة معدتش قبلانا والناس معدوش قابلينا، السواقين معدوش عاوزين يطلعوا بالجرارات من كتر الخوف”.
واستكمل: “لما أكون ماشي بسرعتي 120 كيلو على الخط ومزلقان مقفول ويعدي واحد من المزلقان والقطر يخبطه أنا ذنبي إيه، بياخدوا زميلي ليه، نخاطب مين ولا مين؟”.
وتابع سائق القطار: “أنا بطلع من بيتي ممكن أروح السجن يا أروح للموت، أول أمس وقع حادث في مدينة أبو كبير لسواق قطار 39، وقام أحد الركاب بمعاقبة سائق القطار وضربه بطوبة بسبب دفع 10 جنيه للكمسري، وأغمى عليه وكان هيموت، مما أدى إلى وقوف قطار ساعتين في أبو كبير، هو أنا يعني عايز أموت حد أو أعمل حادثة، أنا طالع من بيتي أكل لقمة عيش”.
وأردف: “كل المسؤولين قاعدين في التكييف كل واحد في وادي، ييجوا يشوفوا الناس اللي بتشتم فينا، قطار المنصورة بيقف أكتر من ساعة إلا ربع والمراقبة مبتردش علينا والناس بتشتمنا، إحنا في وش المدفع، الراكب بيتف في وشي لو الكمسري خد منه 10 جنيه، أبويا وأمي ذنبهم إيه عشان يتشتموا، يبعدوا عننا اللجان اللي مطلعين أبونا، بتوع الانصراف والحضور، يرضي مين ده؟”.
وطالب السائق، صاحب الـ57 عامًا، إدارة السكة الحديد بتسوية أموره المالية وطلوعه سن المعاش مبكرًا، قائلًا: “فاضلي 3 سنوات في السكة الحديد، ولكن عايز التسوية، عشان مش عايز أخش السجن زي الكمسري، ارحمونا من اللجان اللي ضاغطة علينا، محدش ييجي جنبنا، احنا مبناخدش راحات زي المكن اللي احنا بنسوقه، وبشوف عيالي وهما نايمين بسبب إني بروح الشغل الصبح وباجي بالليل”.
