الجمعة 29 مارس 2024
More forecasts: Wetter 4 wochen
رئيس التحرير
محمود المملوك
أخبار
حوادث
رياضة
فن
سياسة
اقتصاد
محافظات

“بمسيرة دعم”.. رامي جمال ممنوع من الاعتزال بأمر من الجمهور والفنانين (صور)

القاهرة 24
فن
الإثنين 11/نوفمبر/2019 - 03:19 م

دعم الكثير من نجوم الفن والرياضة الفنان الشاب رامي جمال في أزمته الأخيرة، عقب إعلان إصابته بالمرض الجلدي المعروف بـ”البهاق”، وتفاعل الفنانون عن طريق نشر الدعم من خلال وسائل التواصل الاجتماعي المختلفة، وتقديم المساندة بتوجيه رسائل الحب له.

وكتبت الفنان زينة قائلة:”إنسان محترم ربنا يعفو عنك.. للأسف إحنا في دنيا ما بترحمش والناس بقت صعبة ياريت نحاول يكون في قلوبنا رحمة.. أنت إنسان موهوب يمكن أنا ما تشرفتش بمعرفتك بس قلبي معاك، واوعى تفكر تتهزم ده مرض عادي، وربنا يعفوا عنك وقول الحمد لله والناس الرحيمة كتير واعتبرني من أهلك والإنسان بموهبته واحترامه وأخلاقه وبس”.

 وقالت الفنانة سوسن بدر: “قدر الله وما شاء فعل الرضا بيشفينا بإذن الله”.

ووجهت الفنانة لطيفة، رسالة دعم لرامي، قائلة:”حبيب قلبي يا رامى يا مبدع يا محترم يا مختلف، إوعى تفكر كده اول حاجه لازم تقول الحمد لله على كل حاجة، دي حاجة حصلت لناس كتير تعالجت منها الحمد الله وبعدين إحنا بنحبك على موهبتك وفنك الرائع وكل جمهورك وأنا منهم بنبقى مستنيين جديدك دايما”، أما الفنان عمر السعيد، قال له:” بحبك زي ما أنت “.

وقالت الفنانة إيمان العاصي:”حبيبي يا رامى أنت أقوى من أي حاجة وفنان وموهوب ونجم وكل ده ولا حاجة قصاد نجاحك وحبك لفنك ربنا يقدرك على الناس عديمة الإحساس ربنا يخليلك ناريمان بالدنيا “.

وتمنى الفنان حمدي الميرغني، الشفاء العاجل لرامي، قائلًا:”ربنا يشفيك يا رامى ده مش حاجة أصلًا ده الصداع أصعب منه ياخويا الناس كلها بتحبك ️..وكل ماتشوفني احمد ربنا وأعرف إنك في نعمة”، فيما قالت له الفنانة إيمي سالم،” كمل واعمل اللي بتحبه و إحنا معاك وفي ظهرك”.

كما كتب الفنان هشام جمال، قائلًا:”عندي إحساس من كلامك إن دي هتكون بداية مرحلة كلها نجاح ونضوج وتركيز إن شاء الله ألف مليون سلامة عليك يا رامي ومستنيين الأغاني الجديدة”، ليرد عليه رامي قائلًا:”شكرًا يا هشام على كلامك الجميل قد ايه وجود المحترمين اللي زيك بيفرق فعلا بيكم بتهون”.

وغرد الفنان أحمد جمال، قائلًا:”سلامتك يا رامي يا حبيبي أولًا ربنا ما بيختارش غير الخير وتأكد إن كل اللي بيحصلنا في الدنيا من تدبير ربنا و رحمته بينا  ثانيًا جمهورك اللي بيحبك هيفضل يحبك و مكمل معاك بأي شكل و في أي وقت ثالثاً وده الاهم مفيش “جمال” ضعيف كل عيلة جمال جامدين يلا يا بطل أنا مستني الألبوم”، ليرد عليه رامى قائلا:” كلامكم بيفرق والله انت مش فاهم أنا قد أيه باخد طاقه إيجابية من المحترمين اللي زيك”.

كما نشر الشاعر تامر حسين قائلًا:”سلامتك يا رامى، حقيقة للى مايعرفش رامى على المستوى الشخصى بنى أدم مُهذب ومُحترم وذوق وصاحب صاحبه لينا مواقف كتير مع بعض محترمة وهو من أعز اصدقائى اللى فى الوسط الفنى، الناس حبوا ألحانك وأغانيك وفنك وقلبك اللى بيطلع الحاجات الحلوة دى، فامعتقدش إن فى حد من اللى بيحبوك يهتم غير بجمال روحك وسيرة وأخلاق الباقى شكليات للسطحين فقط لا غير كمِل ياروما وربنا يعافيك كلنا وراك وفى ضهرك وبالمناسبة عامل مع رامى 3 أغانى منهم اتنين دراما ان شاء الله يعجبوكم جداً يالا يابطل مستنس أشير البوستر ونحتفل”.

كما علق المصور شريف مختار قائلًا: “انا مبعرفش اتكلم كتير في المواقف دي بس أنا كنت دايما بحب فيك انك بتاخد الأمور ببساطه وإيجابية مهما كانت الضغوط صعبة … خليك زي ماكنت دايماً متفائل وإنجز يالا علشان عندنا بوستر البوم جديد عايزين نجهزله علشان نطلع حاجه تليق بيك وبفنك وبالحاجات اللي تخض اللي انا سمعتها “.

وقال الشاعر عبد الرحمن محمد:”ربنا كبير و كريم اوي و قادر قريب اوي يشيفك و يعافيك و ترجع أحسن من الأول يا رامي أصبر واحتسب أجر وعافية إن شاء الله يا فنان يا جدع وبعدين مفيش اوبشن غير انك تكمل غنا عشان كلنا بنعشق فنك مهما كانت الظروف”.

 والشاعر هاني صارو:”صديقي الفنان الجميل رامي جمال ألف سلامة عليك، ماتفكرش في بكرة ولا في كلام الناس، ماحدش فكر فيهم غير وتعب عالفاضي، غني ولحن وإشتغل وركز في النجاح وفي إزاي تبقى مبسوط، وخليها على الله”.

وأعلن أمس الفنان رامي جمال، إصابته بمرض البهاق منذ فترة، مشيرًا إلى تفكيره في اعتزال الفن حال عدم تقبل الجمهور له بعد هذا المرض.

مرض رامي جمال

وكتب رامي عبر حسابه الشخصي بموقع التواصل الاجتماعي”فيس بوك” قائلًا: “الحمد لله الذي أحبني فابتلاني وأقدرني على الصبر من فترة ظهرت بقع بيضاء في جسمي وبالكشف عرفت إنه مرض البهاق وجربت أنواع علاج كتير ودكاترة كتير ومفيش فايدة رضيت وسلمت أمري لله علشان عرفت إن الزعل بيزوده وكفاية شغلانتي وصعوبتها والقلق الدائم من المستقبل”.

 

 

View this post on Instagram

 

A post shared by Ramy Gamal (@ramygamalmusic) on Nov 10, 2019 at 1:07pm PST

وتابع رامي: “فعلا بقي بيزيد لدرجة لفتت نظر ناس كتير اللي بقى يقولي هتتعامل إزاي وأنت فنان واللي يخاف يسلم واللي يسألني هو ده معدي، أنا بقالي سنة فعلا لو عندي حفلة أو تصویر بتعب على ما أشوف طريقة أخفيه بيها لدرجة خلت ناس تقوللي شوف بيزنس تاني اعمله علشان الناس مش هتقبلك كده فكرت في كلامهم بصراحة ولقيت إن عندي حلين یا فعلا شكرا لحد كده على الشغلانة دي رغم حبي ليها وعدم معرفتي بغيرها، یا إما مش هداريه تاني وتقبلوني بيه وترحمو كل اللي ربنا ابتلاهم بيه من نظرة إن شكله غريب، الحمد لله على نعمة الأهل لأنهم الوحيدين اللي بيقبلو الواحد زي ما هو طولت عليكم بس قلت أشارككم في حياة فنان”.

وفي وقت سابق، أعلن النجم رامي جمال، انتهاءه من تنفيذ أغنيات ألبومه الجديد، المقرر طرحه خلال الفترة القليلة المقبلة، وذلك حسبما أعلن على “تويتر”.

وكتب جمال: “تم الانتهاء من اختيار وتنفيذ جميع أغاني ألبومي الجديد وقريبا جدًا إن شاء الله يتم تسليمه لشركة نجوم ريكوردز لبدء تنفيذ مرحلة ما قبل النزول والنزول وأعد بألبوم مختلف لمرحلة مختلفة دعواتكم”.

تابع مواقعنا