بعد حالات الوفاة.. أهالي مصر الجديدة يناشدون المسؤولين إعادة النظر بعملية التطوير لتضرر المشاة (صور)

ناشد عديد من سكان منطقة مصر الجديدة، عبر موقع التواصل الاجتماعي فيس بوك المسؤولين بشأن الحوادث التي وقعت في اليومين الماضين.

فقال أحد السكان: “سكان وأهالي مصر الجديدة بعد الحادث الأخير ووفاة شاب، وسقوط آخر بعد توسعات شوارع مصر الجديدة والمنطقة السكنية التي تكتظ بطلبة مدارس كتير تحولت لكارثة وموت حصل، 4 حوادث منهم 2 وفاة في شارع المقريزي وأبو بكر الصديق”.

وأكمل: “غير أن تحويل شارع الثورة إجباري لطريق السويس عزل سكان ألماظة، وأرض الجولف الوضع كارثي والأهالي بتنتفض على الجروبات”.

في حين اقترحت سيدة، قائلة: “إيه رأيكم نحاول نعمل مداخلات تليفونية في برامج التليفزيون والراديو نتكلم فيها عم مشكلة صعوبة عبور الشوارع بعد التوسعة، ياريت اللي يقدر ينزل أرقام تليفونات أي برامج ينزلها، وكلنا نتصل بيهم يمكن صوتنا يوصل”.

وشاركت أخرى عبر صفحتها على موقع التواصل الاجتماعي فيس بوك: “بقالي ساعة ونص تايهة في مصر الجديدة ، ومش عارفة أوصل سانت فاتيما وبنتي فاتها الامتحان”.

فيما عبرت أخرى عن غضبها قائلة: “واضح إن اللي بيحصل في مصر الجديدة انتقام منها ومن أهلها، المفروض أن كل أهالي مصر الجديدة تستفيد من التطوير اللي بيحصل بالرغم من وجود سلبيات في هذا التطوير.. ما علينا من الآخر مصر الجديدة منطقة سكنية يعني سكانها ناس كبار وشباب وأطفال، منهم اللي صحته تمام واللي صحته على قده ، يعني ناس عايشة بتأكل وتشرب وتنزل تشتري طلباتها وتمشي في الشوارع وتركب مواصلات وعربيات وبتروح أشغالها وجامعاتها ومدارسها وتنزل في الإجازات تتفسح وتتزاور وتروح نوادي وتعزي وتروح أفراح يعني مش ممر صحراوي ولا طريق سفر سريع المفروض محدش يعدي منه.. الناس اللي خططت ونفذت ما تعرفش الكلام دا ولا مش مهتمة بالإنسان أصلا”.

وأردفت أنا بكتب الكلام دا لأني حاسة بكم غضب غير عادي من البوست اللي بينعي الشاب اللي مات في المستشفى بعد محاولته عبور شارع المقريزي.

فيما استنكرت أخرى سوء التخطيط قائلة: “مصر الجديدة تحولت من منطقة سكنية إلى طريق سريع بدون إشارات مرور ولا تطبيق قوانين، مين المسئول عن كبار السن اللي كان بينزل يشتري متطلباته أو يتمشى؟ يمشي إزاي؟ يعدي إزاي؟ بلاش كبار السن أي شخص طبيعي في شارع عثمان بن عفان يعدي إزي والطريق بقى أربع حارات واسعين من غير فواصل”.

وعبرت أخرى عن اعتراضها من تطوير منطقة مصر الجديدة قائلة: “أنا من الأساس معترضة على كمية الانجازات اللي حصلت في مصر الجديدة مش علشان أنا ضد التطور لا لأني ضد التشوية والتخبط وعدم التخطيط، وكل ده وأنا مخرجتش من محيط روكسي، أمبارح كان أسوء يوم مر عليا روحت الحجاز وألماظه وكل مشاويري منحصره بين المنطقتين دول، وشوفت بعيني التشويه والكتل الخرسانية والشوارع الهاي واي واللي بقت فيها اتجاه واحد ومش عارفه أرجع منين، أنا حرفيا رجعت من ألماظه الخليفة المأمون في ساعة ونص بسبب عدم الدراسة للشوارع والتخبط وطباط وعساكر المرور مش فاهمين ومش بيعملوا حاجة غي كتباة المخالفات لأن الناس ماشية عكس، لأنها مش عارفة طريقها، أزاي ورجل المرور نفسه مش عارفه توضح للناس طريقها، وهما نفسهم تايهين، علشان أروح الخليفة المأمون من ألماظه أطلع طريق السويس، وفضلت ألف مرة واثنين والدنيا كمان كانت زحمة، أنا اضطريت أروح شارع النصر للوصول إلى شارع الخليفة المأمون، يعني دخلت مدينة نصر علشان أروح تاني مصر الجديدة، الشوارع مقفولة واتجاه واحد ولا يوجد بديل غير السير غير الاتجاه ، وفي الأخر وانت وحظك يا تلاقي حد مرور يدليلك مخالفة أو والدتك داعية لك، أحنا بقينا حرفيا ماشين بالبركة.

يذكر أن منطقة مصر الجديدة، تشهد حاليا عمليات تطوير وإعادة تخطيط لها، حيث تفقد الرئيس عبد الفتاح السيسي، صباح  الجمعة قبل الماضية، الأعمال الإنشائية لتطوير طرق ومحاور مصر الجديدة وطريق القاهرة السويس الصحراوي.