على غرار “أبو تورتة”.. أمنية وحبيبها “خالد فيونكة” حديث السوشيال ميديا (صور)

تداول رواد موقع التواصل الاجتماعي “فيس بوك” مساء أمس، منشورًا لإحدى المستخدمات تدعى “أمنية عبد الحميد” تسخر فيه من حبيبها السابق، الذي هددها بفي حالة نشر أي شيء يخصه، بعدما تركها وأخبرها أنه يحبها لكن “يده قصيرة” تجاهها، وخطب أخرى بعد الانفصال عنها بأسبوع، الأمر الذي دفعها لنشر القصة على صفحتها.

وتحكي أمنية تفاصيل القصة التي تصدرت تريند تويتر أيضًا تحت عنوان “أبو فيونكة”، موضحة أن بداية قصتها مع خالد كانت منذ عام ونصف، فقد تعرفت عليه صدفة وكانوا أصدقاء، ولكنه عرض عليها الارتباط، ولكنها رفضت في البداية وفضّلت أن يكونا أصدقاء حتى لا يخسرا بعضهما، إلا أنه بعدها بأسبوع أخبرها بحبه لها وأنه يريدها ولا يستطيع أن يبعد عنها.

وأضافت أمنية لـ”القاهرة 24” أنه كان يسافر لها خصيصًا من محافظته بورسعيد حتى مدينتها ليلًا لأنها لا ترد على تليفونها المحمول، وكان يقف أسفل منزلها ويخبرها أنه موجود حتى تنزل ليراها، ومع مرور الوقت أحبته وارتبطت به، وكان جيدًا معها.

وأردفت: “فهمني إني أحسن حد في حياته وكنت مصدقاه وفضلنا مع بعض وكان في بينا مشاكل عشان أنا عصبية وهو مستفز، وجه في مرة قالي أبويا هيجوزني، قلت له ليه أنت عيل صغير، قالي احنا سلو عيلتنا كده، وبنتجوز من بورسعيد وأبويا هيجوزني واحدة محجبة، قلت له روح لأبوك، وقعدت فترة مبكلموش، بعدها بأسبوعين جه يبوس رجلي إني أخليني معاه وقالي بحبك وهقف قدام الدنيا كلها عشان خاطرك وأنا صدقته، ورجعنا تاني لبعض وحصل بينا مشكلة سبنا بعض وبعدها بأسبوع لقيته خاطب”.

وتابعت طالبة التجارة بالكلية الكندية أنها لم تكن تعلم شيئًا عنه منذ 6 أشهر، فهو فجأة اختفى وقال لها إنها تعبته نفسيًا وهو في المستشفى بسببها، واختفى بعدها، بشكل جعلها تبحث عنه ولم تجده، مما جعلها تشعر بالذنب أن تكون ألحقت الأذى به، لدرجة أنها كانت تبكي يوميًا وتقول “يا رب سامحني لو أذيته أو جيت عليه أو تسببت له في مرض نفسي”.

وبيّنت عبد الحميد أنها علمت بعدها بعدة أيام أن خالد خطب، ونشرت منشورًا على صفحتها أول أمس لم تكتب فيه اسم خالد كاملًا وأرفقت صورة من رسالة له يخبرها فيها أنه يحبها “وحياة أخته”، وقالت خالد خطب.

وأكدت: “بعدها لقيت واحدة بتكلمني وتقول أنا أعرف خالد وأنا معاه في كلية الهندسة الجامعة البريطانية، وهو كان بيقولي عليكي كل حاجة وحاكي حياتي كلها تقريبًا وحاجات حصلت ومحصلتش وكلام وحش جدًا عليا، طلع حد مش محترم مش زي اللي أنا كنت شيفاه، بعد كده دخل كلم حد بطريقة غير مباشرة وقاله يقولي لو عملت حاجة هوريها، ولما نزلت من شقتي لقيت عربيته راكنة تحت عمارتي لأنه ساكن في مدينتي معايا، صاحبتي قالت لي اطلعي وأنا هتكلم معاه بأدب، ومرضيش يتكلم بأدب فطلعنا البيت، ومسكنا الموبايل وكلمنا باباه حكيناله اللي حصل وهو قال أنا هتصرف معاه ولما قفلنا معاه نزلت بوست على الفيس تريقة عليه وانتشر جدًا”.

وأشارت أمنية إلى أن خالد منذ 7 سنوات في كلية الهندسة لم يتخرج بعد، وهو يعمل مع والده في بورسعيد في مجال التجارة، أما عن خطيبته فقد مسحت صورها معه وحذفت “الريلاشين” من على صفحتها على “فيس بوك”، وذلك بسبب أن هناك بنات حدثتها عنه وأخبرتها بماضيه وتعدد علاقاته العاطفية مع البنات، كما قام الناس بإرسال رسائل “شتيمة” فيه لها على صفحتها.

كانت بداية القصة منذ أن نشرت أمنية عبد الحميد منشورًا على صفحتها الشخصية على موقع التواصل الاجتماعي “فيس بوك” مساء أمس قالت فيه: “والله يا جماعة كل اللي بكتبه دا مش وحاشة مني ولا لأني خلاص حابة الفضايح أوي، بالعكس أنا يمكن أكتر الناس اللي مبتحبش الفضايح ولا بحب أجي على حد، بس اللي يأذيني يستحمل، وأنا الشخص دا أذاني أوي وكذب عليا و كمان طلعني أنا اللي وحشة وظالمة وعيشني كل يوم في ذنب لمدة ٥ شهور بدور عليه زي المجنونة وفاكرة إني جيت عليه وأذيته، وأنا قررت إني مش هسكت، لأني حذرته أكتر من مرة، لو أذتني مش هسكت ومش هيهمني ولا بخاف من حاجة ولا يفرق معايا أي حاجة غير نفسي، افتكرني بهزر تقريبًا أو كان فاكر إنه هيكسر مني حتة وأنا هصلحها تاني، ميعرفش إني هكسر الباقي على دماغ أهله، والله أنا بضحك و أهزر بس أنا جوايا كتير، مشاعر متلغبطة بين حب وكره وزعل وغل وانتقام وكل حاجة في بعض، كل الناس بتقولي كبري دماغك ومتكتبيش حاجة، واللي تقولي إنتي متعرفيش ممكن يحصل ايه بعدها، بس أنا بقول لا، أنا هفضحه في كل مكان ومش فارق معايا أي حاجة حاليًا غير نفسي، هتسألوني اشمعنا الطريقة دي اللي هتخدي بيها حقك، هقولكوا عشان هو أكتر حاجة بيخاف منها هي الفضايح وكلام الناس، زيه زي أي راجل مصري يعني”.

وبعدها بساعات نشرت منشورًا أخرًا مضيفة: “طب يا جماعة الأستاذ أبو أيد أقصر منه بيهددني وبيقول إني لو نزلت حاجة عنه هيخفيني من على وش الدنيا، مش مكفيه إنه كذب عليا سنة ونص وفهمني إني كل حياته وبعدها قالي معلش أنا أيدي أقصر مني أنا بحبك بس لازم نبعد ياحرام عشان إنتي عصبية ووحشة بس أنا بحبك طبعًا، وفهمني إنه تعبان ودخل المستشفى بسببي وإني جايه عليه يا حرام، وراح خطب بعد ما سبنا بعض بأسبوع، لا دا كمان بيتكلم عليا مع الناس كلام ميتوصفش، دا حاكي حاجات في حياتي أنا والله نسياها وحاجات أول مرة اسمع عنها، ومطلعني أنا اللي ظلماه ووحشة وكمان بيهدد، يا بجاحتك يا أخي، دا طبعًا جزء من اللي هو عمله أنا مكتبتش كل حاجة، فأنا أهو بقولك يا خالد محمد الريس إني بجيب سيرتك، وإنك مش راجل، اعملوا كومنتات كتير عشان البوست ميتمسحش، ولو حصلي أي مصيبة اعرفوا إن هو السبب”.

وبعد انتشار الموضوع على “فيس بوك”، نشر العديد من الرواد المنشورات التي كتبتها أمنية متعاطفين معها، وسخروا من حبيبها السابق في جمل مثل “أبو شنب شبه الفيونكة”، و”أبو أيد قصيرة”، وكذلك  أطلقوا عليه لقب “خالد فيونكة”.

ومنذ 7 ساعات نشرت أمنية منشورًا أخرًا على صفحتها معربة فيه عن هدم خوفها منه مبيّنة: “عشان الناس اللي فاكرة إني خايفة منه وقلقانين عليا إنه يعمل حاجة، دا فيونكة على الفاضي يا جماعة، اللي عارفني عارف إني مبخفش من حاجة ولو كنت خايفة 1% بس مكنتش هنزل بوست، أنا بس كتبت إنه بيهددني عشان الكل يعرف هو بيعمل إيه، وإني كنت ناوية اسكت بس هو بجح، وأهو بالمرة لو فكر يعمل حاجة فضيحته تبقى أكبر”.

وحاول “القاهرة 24” التواصل مع خالد للرد على ما ادعته أمنية على صفحتها على “فيس بوك” دون جدوى، بعد أن أغلق هاتفه وصفحته الشخصية على “فيس بوك”.