“حماية المستهلك” يستدعى ممثل “كارفور” بسبب شكاوي الشراء أون لاين (بيان)

أصدر جهاز حماية المستهلك، بياناً بشأن ماورد من شكاوي السادة المواطنين و المتضررين من بعض المخالفات حال شرائهم عبر الأنترنت من موقع كافور.

وقال الجهاز فى بيانه، إنه تم استدعاء ممثل كارفور والتوجيه بسرعة حل كافة الشكاوي و تلافى المخالفة و إخطارهم بأنه سوف يتم اتخاذ الإجراءات القانونية حال عدم التفاعل مع شكاوي المواطنين و العمل علي حلها فورا حفاظا علي حقوقكم.

ويهيب الجهاز بالمواطنين موافاته بأي مستجدات وتواصل الشركة مع العملاء من عدمه، ويأكد الجهاز حرصه علي حفظ وصون حقوقهم.

وكان عدد من المواطنين نشروا شكاوي بشأنهم عدم استلام منتجاتهم بعد عمليات شراء أون لاين عبر الإنترنت منذ أيام وعدم تجاوب المتجر معهم أو خدمة العملاء وتفاعلهم لحل هذه الشكاوي او الاستجابة لهم.

وكتب أحمد عبد اللاه أحد المتضررين من كارفور عبر صفحته على “فيس بوك”: “كارفور نصابين وبيساعدوا في انتشار كورونا بدل ما يبقوا سبب وقاية الآلاف من الناس.. علشان بس الناس اللي عايشة معانا في نفس البلد ومستنكرين عليما أوي أننا عايزين نسحب الكاش في أيدينا علشان نشتري بيه اللي محتاجينه ويقولك م تشتري أون لاين بالكارت بتاعك، انا الصراحة سمعت كلامكوا ورحت اشتري من كارفور وقولت اجنب نفسي المخاطرة واني انزل واختلط بالناس في وقت وباء ومحدش عارف ممكن يتعدي من مين”، مطالباً بمقاطعة الشراء من كارفور.

وتابع: “بالفعل عملت أوردر يوم 27 مارس الفجر تقريبا، بعد م قعدت بتاع ساعتين بجمع في حاجتي، وجيت بدفع لاقيت الأبلكيشن بيجبرني ادفع بالكارت وقالي التوصيل في خلال 24 ساعة بس استغربت جدا وقولت مش مشكلة حتى لو أتأخر يومين، عدى حتى الآن أسبوع بحاله الفلوس اتخصمت من حسابي، والأوردر موصلنيش ومفيش ولا رقم من أرقام خدمة العملاء بيرد إطلاقا والصفحة الرسمية بتاعتهم بترد عليا بالقطارة وكل م اكتب كومنت يقولي هات رقم الطلب واديهوله محدش يرد وهكذا وهكذا، ولاقيت أن مش انا بس اللي حاصل معاه الموضوع ده في مئات من الناس بتناشد البهوات في كارفور أنهم يستسمحوا ويردوا علينا أو ع الأقل يرجعولنا فلوسنا أو أضعف الإيمان خالص خلونا ننزل ناخد حاجتنا من الفرع مدام سحبتوا الفلوس كدة كدة”.

واستطرد العميل المتضرر: “في الآخر مفيش فرد خدمة عملاء واحد بيكلمنا أو يرد علينا أو يعبرنا أو يقولنا وضع الأوردر اللي عملناه ايه أو يلغي الأوردر حتى ويرجعلي فلوسي، ولغاية دلوقتي الناس بتستغرب ليه المواطن المصري مبيحبش يشتري بالكروت ومصمم ع الكاش، وأظن الإجابة واضحة لأنه بيتعامل مع شوية شركات نصابين بلا أي مصداقية، ولا ليها أي سيستم محترم يوفرله الحماية في حالة عدم توصيل أو حدوث أي مشاكل في أوردره، ومش قادر أفهم ازاي شركة زي الفطيم ممكن تبقى بالسوء ده وتسيب المهزلة دي تحصل بلا أي رابط أو ظابط مهما كان الضغط”