الخميس 28 مارس 2024
More forecasts: Wetter 4 wochen
رئيس التحرير
محمود المملوك
أخبار
حوادث
رياضة
فن
سياسة
اقتصاد
محافظات

مصطفى يونس: “أتمنى انضمام نجم الزمالك للأهلي.. ومصر مفيهاش كورة” (حوار)

القاهرة 24
رياضة
الأربعاء 06/مايو/2020 - 02:51 م

يعد من أفضل المدافعين الذين مروا على تاريخ كرة القدم المصرية، لقب بـ”بيكنباور” مصر.. إنه مصطفى يونس، نجم الأهلي سابقا، الذي يفتح قلبه لـ”القاهرة 24″ ويروي بدايته مع الساحرة المستديرة، ويجيب عن أهم الأسئلة المطروحة على الساحة الرياضية.

في البداية حدثنا عن بداية مسيرتك في عالم كرة القدم؟

بدايتي كانت في نادي البلاستك وكان عمري وقتها 14 سنة، وذهبت للاختبارات ولم يتم قبولي، وروحت مرة تانية في السنة الي وراها وكان عمري 15 سنة واتقبلت في الاختبارات، وفي اليوم اللي كنت همضي فيه في نادي البلاستيك كان عندي ماتش كرة شراب في قليوب، ووقتها مروحتش النادي وروحت لعبت ماتش الكرة الشراب، في اليوم اللي بعده روحت النادي عشان أمضي.

دخلت النادي الأهلي لأول مرة في صيف عام 1968، استمريت في اختبارات الأهلي لمدة شهر وكان معايا وقتها 25 ألف ناشيء من مختلف الأعمار السنية اتقبل منهم 7 في الاختبارات، كنت أنا من ضمنهم، وتدرجت في الأعمار السنيىة حتى وصلت للفريق الأول.

ماهو أول راتب حصلت عليه من كرة القدم؟

كان خمسة جنيه، وكنت أول لاعب من جيلي يحصل على مرتب شهري 5 جنيه ووجبة داخل الناديـ وكان معايا وقتها محمود عبد الفتاح الله يرحمه من العباسية، وكان قد الخطيب فنيًا عشر مرات.

من وجهة نظرك ما هي المراكز التي يحتاج الأهلي لتدعيمها في الصيف المقبل؟

من وجهة نظري شايف إن مركز قلب الدفاع ضعيف والأهلي يحتاج للتعاقد مع حجازي، ومركز رأس الحربة يجب تدعيمه في الفترة المقبلة، وعودة أكرم توفيق أصبحت أمر ضروري ليكون بديلًا قويًا في مركز وسط الملعب.

ما رأيك في موقف أحمد فتحي ورفضه للتجديد؟

احنا في عالم احتراف وأحمد فتحي دور على مصلحته واللي يأمنله مستقبله وخاف يحصل معاه زي ما حصل مع عاشور وطاهر أبو زيد وغيرهم من النجوم، والأهلي أخطأ منذ البداية في تقييم أحمد فتحي ماديًا واللاعب كلما زاد عمره، قلت قيمته المادية وليس العكس.

أفضل لاعب في مصر من وجهة نظرك؟

أحسن لاعب وهيبقى الأفضل في مصر هو مصطفى محمد، وهو مستقبل مصر، بس لازم يتروج صح وميحصلش معاه زي شيكابالا ومحمد إبراهيم وغيرهم.

لاعب تتمنى انضمامه للأهلي؟

بكل تأكيد مصطفى محمد لأنه الأفضل في مصر، وهيفيد الأهلي كتير.

هل ستعود كرة القدم على ما كانت عليه قبل فيروس كورونا؟

احنا معندناش كورة من الأساس ولا قبل الفيروس ولا بعده احنا بنلعب كرة عشوائية، لما دوري يتحسم في منتصفه يبقى مفيش دوري ولا فيه كورة، احنا دوري مفيهوش منافسة، لما يبقى عندنا خمس فرق بينافسو على بطولة الدوري وقتها بس هيبقى عندنا كورة.

تابع مواقعنا