ممرضات مستشفى صدر دمنهور يطالبن بأخذ مسحات منهن بعد إصابة زملائهن بكورونا (فيديو)
تداول عدد من مستخدمي موقع التواصل الاجتماعي”فيس بوك”، بالبحيرة فيديو لعدد من ممرضات مستشفى صدر دمنهور، المخصص لاستقبال حالات اشتباه فيروس كورونا بمحافظة البحيرة، يظهرن فيه ويطالبن بأخذ مسحات لهن لفيروس كورونا، بعد إصابة عدد من زملائهن في المستشفي، وخاصة بأن المصابات لم يظهر عليهن أي أعراض، كما طالبن بتطهير وتعقيم المستشفى.
وظهر في الفيديو عدد من الممرضات بالمستشفى وفي البداية تحدثت إحدى الممرضات قائلة: “مشكلتنا أن المكان مش مطهر ومش نضيف، والمديرية قالت إن عمل مسحات لكل الفريق مستحيل، وأن الماسكات موجودة أينعم بس مش كافية، وكلنا محتاجين المكان يتقفل ويتطهر عشان زملائنا اللي أتصابوا مكنش عليهم أي أعراض”.
وتابعت قائلة: قالولنا اعملوا الرابيد تيست، ولما هو كده حاجة كفاءة كده زى ما بيقولوا مش بيتعمل للمريض ليه، وليه بعمل للمريض مسحة ليه انا اللى بشيل المريض ميتعملناش مسحة عشان اطمئن على نفسي، أنا ممكن تكون مناعتي قوية، بس عيالي مش مناعتهم قوية، وأبويا مش مناعته قوية، وجوزي مش مناعته قوية”.
ولفتت قائلة: زملائنا اللى أتصابوا مكنش عليهم أي أعراض واتخالطوا معنا ومسكوا دولابنا ومسكنا دولايبهم ومسكنا هدوم بعض، عشان ده حكم الشغل، وفى الآخر اللى طلعوا إيجابيين عزلوهم في مكان في ناس سليمة”. وتساءلت: هل البروتوكول بيقول إن في ناس إيجابي أقعدهم في نفس المبنى اللى في ناس سلبي بعد ما خدوا مسحات، مستنين القرار روحوا بيوتهم عادي أنا واحدة من الناس عملت مسحة طلعت سلبي، وفي نفس اليوم خالطت 2 إيجابي من زملائنا”.
واختتمت: كل طلباتنا يا جماعة أن المستشفى تتقفل علينا أحنا، مش معترضين على الشعل مبدئيا ومستشفى الحميات تقوم بالدور ده، والنهاردة اعترضنا على الشعل جابوا 5 من الحميات اشتغلوا معندناش مشكلة قعدونا في بيوتنا 15 يوما، نتعزل في بيوتنا والحميات تشتغل بدلا مننا معندناش مشكلة والوضع ده مش شغالين”.
وقالت ممرضة أخرى: المرضى منهم سلبي وفي منهم إيجابي المريض اللي جاي سلبي ده مش خايف على نفسه ممكن يتعدي مننا احنا نفسنا بقينا مصدر عدوي، يعني المريض اللى جاي سلبي ممكن يتعدي من الفريق اللي هم أساسا خايفين أنهم يعملوا مسحات، خايفين تعملوا مسحات ازاى هنتعامل مع المريض يعني المريض اللي جاي سلبي أنتم مضحيين به عشان كده بيتحاولوا لإيجابي احنا كده ذنب المرضي اللى اتحولوا من سلبي إلى ايجابي في رقبتكم وإحنا كمان في رقبتكم”.
يشار إلى أن مستشفى صدر دمنهور شهدت خلال الأيام القليلة الماضية، ظهور أول إصابات بين طاقم التمريض وبلغ عددهم 8، بالإضافة إلى مخالطيهم من أسرهم، وزار وكيل وزارة الصحة بالبحيرة أمس الخميس المستشفى، وتم عمل حملة رش وتعقيم وفقا لبيان مديرية الصحة بالمحافظة.
