شادي محمد لـ”مرتضى منصور”: “اللي هيغلط فينا هنطلعله العين الحمرا يا رجل القانون

رد شادي محمد، لاعب النادي الأهلي الأسبق، على تصريحات مرتضى منصور رئيس نادي الزمالك، أمس، بشأن دفاعه عن مجلس الأهلي للعمل في قناة النادي مجددا، مؤكدا أنه سيساند أي شخص يرتبط اسمه بالقلعة الحمراء في أي وقت وبدون أية مناصب.

وكتب شادي محمد عبر حسابه الشخصي على موقع “فيس بوك”: “اتبعتلى مئات الرسايل من الجماهير المحترمة لمداخلة رئيس الزمالك وبيقول عني أنا بدافع عن المجلس الحالي والكابتن الخطيب علشان يشغلوني وانا كنت ضده فى الانتخابات وبتمني يرضى عني ومش هيشغلوني بردو وزعلان من كلمه العين الحمرا بعد قرارات مجلس الادارة”.

وأضاف شادي محمد: “هو المفروض لما تكون ضد أي حد فى انتخابات وينجح. وأنت مش مؤيد له تشتموا وتسبه وتلعنه علشان ترضي الناس وارضيك وكده أنا مش منافق ممكن يكون فى نماذج عندك وهم الأغلبيه بتكسروا فى عضم بعض وديه حقيقة”.

مرتضى لشادي محمد: بطل تطبيل مش هتشتغل في الأهلي.. والمستشار القانوني للخطيب محامي أبو تريكة

وتابع لاعب الأهلي الأسبق: “إللي عايزك تعرفوا، أنا غير إني أهلاوي ومشجع قبل لاعب وافهم فى الأصول والأدب والأخلاق وكيفية ثقافه الاختلاف هفضل اساند الكابتن محمود الخطيب والمجلس بالكامل واى حد اسمه مرتبط بأسم الاهلي وبدون مناصب علشان ديه ثقافه ممكن ماتكونش عند ناس كتير”.

وواصل: “لينا كبير والكبير بتاعنا اللى اخترته الجمعية العمومية الكابتن محمود الخطيب ومجلسه اللى يمسهم يمسنا ومعاهم فى اى قرار وهنساندهم فى الصح هو ده بقا بيزعلك فى ايه”.

واستمر: “بالنسبه لقصة بعمل كده علشان اشتغل ده اسمه تفكير ضيق أوى علشان أسمى وبطولاتى وتاريخى اشتغل عادي جداً مش ببوست أنت زعلت منه.. وفعلا كنت هتحبني أوى لو غلطت او هاجمت رمزنا وكده أنا مش منافق صح”.

واستطرد شادي: “لكن إني اساند وأصرح وأدعم بيتي ورئيسه ومجلسه كل هذه التجاوزات استغربت عارف ليه.. علشان النماذج اللى حواليك تديهم حاجة أو منصب يشكروك تسحب المنصب يهجموك بقا حبكم لناديكم مرتبط بالمنصب فحضرتك استغربتني ، فأنا أهلاوى بيعشق ناديه من غير نوايا خبيثه فيها مصلحتي بس .. وافهم مش أنا الشخصية اللى بتشتغل فى بيتها أو ناديها تمدح فى ولما تخرج منه تهاجمه وتقلل منه مش احنا اللى بنعمل كده”.

وأتم شادي محمد: “تاني إللي هيغلط فى الأعراض واللي يهين حد عندنا واللى هيتطاول واللى هيقلل مننا هنطلعه العين الحمرا ده يزعلك فى ايه ، وأخيراً العين الحمرا مش بتطلع لحد بيتكلم معانا او ينتقدنا بأدب واحترام واخلاق يارجل القانون”.