حلا شيحة ترد على اتهامها بازدراء الفن بعد اعتزالها: “عمري ما قولت إنه حرام”
كشفت الفنانة حلا شيحة، حقيقة إساءتها للفن بعدما اعتزلت منذ 12 عامًا، حيث قالت إنها عاشقة له مثل عائلتها خاصة والدها الفنان التشكيلي الشهير أحمد شيحة، والذي بدأ الرسم عندما كان طفلًا في سن الرابعة من عمره.
وتابعت حلا خلال لقائها في برنامج “التاسعة” والذي يقدمه الإعلامي وائل الإبراشي على القناة المصرية الأولى، : “أنا طول عمري شخصية متسامحة دايما الطيبة الغالبة عليا، ومحدش يعرف إيه جوايا، وأحيانا بزعل من الناس اللي عاملين نفسهم متدينين، والفضيلة مش بالشكل، وعلاقتك بربنا محدش يعرفها غيرك وغيره”.
وأضافت: “بس عادي بمر بلخبطة في حياتي، ودايمًا بشوف إن الإنسان القوي هو اللي عنده هدف، وربنا شايف فيك حاجه بيقولك استغلها، أنا بزعل لما بلاقي الناس بترمي الزبالة في الشارع لأن مصر أم الدنيا، وأما عن ارتباها مرة أخرى بعد الطلاق: “الحب ده أحلى حاجة في الدنيا، مافيش أجمل من الحب وأنك تتحب، وتسمع حد بيقول كلام حلو، بس دلوقتي مركزة في شغلي ومع أولادي، ولو حب جه في حياتي عادي هعيشه”.
واستكملت أنها مصممة على الاستمرار في التمثيل وأن تنجح بشكل كبير بعد عودتها، فقالت: “أنا بحب الفن، ومؤمنة بيه، واتربيت على كده في بيتي، والدي بيحب الفن أوي شايف إنه الفن بيحقق كل حاجة، بيقولي دايما أنا شايفه رسالة”، كما أكدت أنها لم تسيء إلى الفن بعد اعتزالها: “حتى قالو إن أنا لما سبت الفن قولت إنه حرام، أنا بقول دايما إنه جميل، شوف الطبيعية اللي حواليك حتى الميوزيك الموسيقيى اللي بنسمعها وبتبسطنا نقول إنها حرام؟”.