بشرى عن تقديمها السيرة الذاتية لداليدا: “سيتم طمس الدور المصري في مراحل حياتها الأولى” (فيديو)

انتشرت خلال الأيام الماضية، بعض الأخبار التي تفيد بتقديم الفنانة بشرى، السيرة الذاتية الخاصية بالنجمة الراحلة داليدا، بمسلسل يعرض خلال المارثون الرمضاني المقبل 2021.

ونفت بشرى تلك الأخبار، خلال مداخلة هاتفية ببرنامج “مع قصواء”، وأوضحت قائلة: “ده مشروع بقالنا فترة بنتكلم فيه، والمفروض أنه كان في نوايا أنه يتعمل، ومشينا بعض الخطوات فيه، ولكن بعد الفيلم الفرنسي الأخير عن الراحلة، تم تعديل المسار أنه يبقى مسلسل وليس فيلم أو عدة حلقات”.

وأضافت: “الموضوع كان من سنتين وتم الإعلان عنه من 2015، وتجدد الظهور بسبب تقديم الزملاء عن أعمال السيرة الذاتية، وبالنسبة للصور، فأنا كنت بعمل بروفات شكلية، والصور دي مش حديثة، أنا كتت بعمل اللوك ده وبنجربه، وفي مراحل لداليدا كتير، مش مرحلة شكلية واحدة”.

واستكملت حديثها معلنة عن الصعوبات التي تواجه تقديم العمل في الوقت الحالي، وقالت: “لكن الحقيقة أن الموضوع صعب يتعمل هذا العام، بسبب صعوبة الحركة، لأنه محتاج سفر في أكثر من دولة زي مصر وفرنسا وإيطاليا وربما مجموعة دول اخرى، لأنها قضت أول عشرين سنة في مصر وبعد كدة بقية حياتها في فرنسا”.

وأردفت: “واللي استفزنا أننا نعمله هو أننا غيورين على أول عشرين سنة في حياتها واللي قضتهم في شبرا لأنه دايما بيهضموا الفترة، وبيتم طمس الدور المصري في مراحل حياتها الأولى”.

واختتمت حديثها: “إحنا ماشين فيه وبنكتب في المشروع، وفي ناس كتير حابة تعمله ومتحمسة له، ولكن لحد دلوقتي لم نستقر على المؤلف أو المخرج، لكن اللي ابدوا إعجابهم كتير زي الكاتبة الكبيرة مريم نعوم، واتكلمنا فيه قبل كدة أنا وهي، ولكن لسة مفيش جهة منتجة، ولكن هيكون في جهة انتاجية أجنبية، علشان أخوها مازال على قيد الحياة، وهو اللي لازم يواقف على الشخصية اللي هتعمل اخته، وهو كان وافق على شخصي أنا، وإني أقوم بالدور ده، وأنا لقيت حالة من الصحوة الإعلامية حول الموضوع، ولكن طبعا في الوقت الحالي هل هنقدر نسعى في المشروع، بجانب هيكون في ممثلين من جنسيات مختلفة”.

بشرى عن تجسيد شخصية أحمد زكي: محمد رمضان متشبع به وقادر على تقديمه بتمكن (فيديو)