تامر حبيب يحكي مواقف إنسانية جمعته برجاء الجداوي: كانت الساحرة الطيبة بالنسبة لي

انتاب الفنان تامر حبيب، صدمة كبيرة، بعد سماعه خبر وفاة الفنانة رجاء الجداوي، التي رحلت عن عالمنا اليوم الأحد، عن عمر ناهز 86 عامًا بعد صراع مع فيروس كورونا المستجد وتدهور حالتها الصحية بمستشفى العزل الصحي بمنطقة أبو خليفة في الإسماعيلية.

وقال تامر وهو يبكى منهارا في مداخلة هاتفية من خلال “القاهرة الآن” الذي تقدمة الإعلامية لميس الحديدي عبر شاشة قناة “الحدث العربية”: “انا مش كنت بس صديق لعائلة رجاء الجداوي، أمي توفيت من سنتين وأمى اتوفيت تاني النهاردة أنا كنت متربي في بيتها، الست دي بالنسبة ليا كانت أم تانية لرجاء الجداوي وأب تاني اسمه حسن مختار الله يرحمه، بالنسبة ليا هى كانت الساحرة الطيبة”.

وتابع: “أنا وأميرة كنا صحاب من 6 ابتدائي قررنا نبقى أخوات وهي كانت بنت وحيدة وأنا كمان كنت ابن وحيد، فكنت بروح عند الست دي أشوف حالة اللي كنت بحلم بيها أشوف عادل إمام، حسين كمال و فنانين كتير، كانت بالنسبة ليا الساحرة الطيبة اللي كانت بتحقق ليا الأمنيات اللي كان نفسي فيها، أول مرة أعرف يعني إيه سيناريو كان في بيت رجاء الجداوي، لما كبرت عرفت فعلا أنها الساحرة الطيبة اللس كان عندها كم من العطاء والأمومة بدون أى مقابل”.

وأضاف: “أنا كنت محظوظ أن اشتغلت معاها أكثر من عمل وكنت محظوظ، لما كانت تدخل اللوكيشن تلاقي البسمة على وش أي حد في اللوكيشن، موضحًا أن وجود رجاء الجداوي في أي عمل كان يعطي بهجة و أمان، لدرجة لما كنا بنصور مسلسل جراند أوتيل هي كانت معانه وده كان بعد وفاة أستاذ حسن، وكانت هي لسه بتقف على رجليها، كان في مرة كل فريق العمل بيتعشى في مكان وهي بس اللى ابتدت تتكلم كان في إلحاح يومي من الصغير والكبير على أن مش هنشتغل غير لما تنزل”.

وأردف قائلًا: “الست دي من أول يوم لآخر يوم عرفت الست دى عمر ما شوفت حد اتجرح منها، والدليل أن العالم العربي كله حزين عليها شوف كم ختمة قرآن اتعملت، كم الدعاء ليها”.

أما عن آخر مسلسل ظهرت فيه رجاء الجداوي وهو مسلسل “لعبة النسيان”، أردف: “أنا أول ما ابتديت ترشيح قولت زوزو رجاء الجداوي، علاقة دينا الشربيني برجاء الجداوي حصل ما بينهم أمومة مش طبيعية كانت هي الروح الطيبة في المسلسل، وآخر كلمة قالتها في نهاية العمل الغفران أهم بكتير من الانتقام، الجملة دى كلمتني فيها وقالت ليا جميلة أوي وعطيت كانت دمعتها قريبة أوي آخر أيامها وكأنها كانت حاسة أنها هتموت”.

بانهيار شديد.. يسرا عن رجاء الجداوي: ست مش هتتكرر تاني.. نضيفة ونقية وقدوة للناس

ابنة رجاء الجداوي منهارة: “شغلها أهم حاجة في حياتها.. سابتلي حب الناس والأخلاق”