“خايف أموت قبل ما أشوف النجاح”.. محمد صلاح يعلن إصابته بكورونا ويطرح بروتوكول الموهوبين

أعلن الفنان محمد صلاح إصابته بفيروس كورونا المستجد (كوفيد-19) منذ يومين، ودخوله مستشفى صدر العباسية بالقاهرة، من أجل العزل وتلقي العلاج.

وكتب محمد صلاح عبر حسابه الشخصي بموقع التواصل الاجتماعي “فيس بوك”: “بكتبلكم وأنا على سريري في مستشفى صدر العباسية، وبعد عمل أشعة مقطعية على الصدر اللي أكدت إني أصيبت بالوباء اللعين وقالولي اتأخرت ليه”.

وأردف قائلا: “يمكن تكون آخر كلمات ليا في الدنيا دي.. اترددت كتير بس لقيت نفسي مش قادر وبكتب، لأني حسيت إحساس غريب حسيت إني مش خايف من الموت.. أنا خايف إني أموت قبل ما أشوف النجاح”.

وتابع: “استغربت وقولت لنفسي أنت مش خايف من الموت؟، قولت والله لا .. أنا خايف أموت قبل ماشوف نجاحي .. بلدنا بقى الحلم فيها .. إنك بس تشتغل .. أنت بس بتحاول طول الوقت أنك تشتغل .. وتخبط على البيبان وكل البيبان بتتقفل في وشك”.

وأضاف: “شباب في أول عمرهم وشباب بقوا رجال، ورجال أصبحوا كهولا وبنات وسيدات موهوبين خريجين المعاهد والكليات الفنية وماوقفوش أمام كاميرا.. واللي هاجر واللي اكتأب واللي انتحر.. أجمل ما في الوجود الحلم والطموح وأقبح مافي الوجود عدم تحقيق الحلم أو الطموح ده”.

واستكمل: “أنا كل اللي بتمناه العدل.. أن الموهوبين دول ياخدوا فرصة من الفرص الكتير قوي دي، معرفش إزاي ممكن يتحط النظام، اللي بيه كل الموهوبين الدارسين أعضاء نقابة المهن التمثيلية ياخدوا فرصة، واللي يثبت نفسه يكمل واللي مايثبتش نفسه الجمهور هايقول عليه لا، بس بعد ما يكون أخذ الفرصة”.

وختم حديثه طارحا اقتراحلحل تلك المشكلة، قائلا: “فكرت ولقيت أن أنسب حل، وأنا يمكن ماحضرش تنفيذه أو حتى الموافقة عليه، هو عمل بروتوكول ملزم بين الدكتور أشرف زكي، بصفته نقيب فنانين مصر ورئيس أكاديمية الفنون المصرية، على فكرة اكاديمية الفنون في أمريكا هي اللي بتمنح جائزة الأوسكار، والأستاذ تامر مرسي، بصفته رئيس مجلس إدارة الشركة المتحدة للخدمات الإعلامية أكبر وأهم شركة إنتاج في الشرق الأوسط”.

وتابع: “وأنا عندي ثقة عظيمة في إحساسهم وتفانيهم في حب عملهم وحب مصر.. وطبعا بعد كده ممكن كل شركات الإنتاج والمخرجين يمضوا ويفعلوا نفس البرتوكول، واللي لازم الجميع يتفق على بنوده وصياغته، وأنا عندي ثقة كبيرة في كل القائمين على هذه الصناعة الكبيرة والعظيمة، وفي قائدنا الحكيم المخلص السيد الرئيس عبد الفتاح السيسي، اللي أكيد هايرحب بالعدل أو شكل من أشكال تحقيق العدالة، ويارب لو اتحقق الحلم ده، وكنت يعني لاقدر الله مت، أبقى مت وأنا مستريح وسيبت لأولادي مايفخروا بيه”.

وشارك محمد صلاح في العديد من الأعمال، مثل مسلسل الأب الروحي، ظل الرئيس، عمارة رشدي، ولاد تسعة، مكتوب على الجبين، الرحايا حجر القلوب، الإمام المراغي، إمام الدعاة، عباس الأبيض في اليوم الأسود.