هيثم عرابي ينتقد مصطفى يونس بعد هجومه على الخطيب

انتقد هيثم عرابي مدير التعاقدات السابق في الأهلي، تصريحات مصطفى يونس الكابتن السابق للقلعة الحمراء التي هاجم فيها محمود الخطيب رئيس مجلس الإدارة.

ووجه عرابي سؤالًا لمصطفى يونس عبر صفحته على موقع التواصل الاجتماعي “فيس بوك” قائلًا: “عندي سؤال للكابتن مصطفى يونس وقبل ما أقول سؤالي، اتعودنا واتعلمنا اننا بنحترم الكبار في النادي وهو ليه مني كل احترام وأي حد لبس تيشيرت النادي الأهلي أو أي حد إداري أو عامل عمل حاجة للنادي الأهلي فهو له كل الاحترام حتى لو اختلفنا معاه ده عشان دا اللي اتعلمناه”.

وتابع: “سؤالي يا كابتن مصطفى إيه مفهوم حضرتك عن ابن النادي؟؟ هل ابن النادي اللي يطلع يهاجم النادي في الفضائيات؟؟ هل ابن النادي اللي يقلل من اللي اشتغلوا في النادي؟ هل ابن النادي اللي يبيع النادي عشان فلوس زيادة؟ أنا مش ممكن أزايد على حبك للأهلي لأني مقتنع ان فيه ناس كتيرة بتحب النادي بس بأسلوبه ومقتنعة انها صح وانها كدا بتفيد النادي بس عايز افهم؟ عشان أنا مختلف في قصة ابن النادي، وأنا شخصيا عانيت جدا ان ناس كتير مش بتعتبرني ابن النادي ودخيل عليكم ومرفوض، لما حضرتك تقول على كابتن الخطيب إنه مش ابن النادي؟! أومال مين ابن النادي! ايه مفهوم حضرتك عن ابن النادي؟”.

وأضاف:”هو لازم تكون من ناشئين النادي علشان يتقال عليك ابن النادي؟ برة كده محدش فينا يبقى ابن النادي؟ انا اعرف لاعيبة لعبت وقت صغير جدا في النادي وعندها حب وولاء للنادي غير طبيعي وأنا كنت فاكر ان ابن النادي اللي بيخلي مصلحة النادي فوق مصلحتة، اللي بيحترم تاريخ النادي وبيحترم رموز النادي وبيحترم كل حاجه تخص النادي، أنا فاهم ان الوقت والتاريخ والأيام اتغيرت تمامًا”.

وواصل: “بس مش للدرجة دي.. والحقيقة فرصة أقول حاجة شايفها من زمان عشان الموضوع مش ك مصطفي بس .. النادي مش حكر على حد وحب النادي مش على الفيسبوك ولا بتصريحات على الهوا ولا بكام كلمة حلوة ولا بكام بوست يجيبوا عدد، في ناس اعرفها معندهاش انترنت ولا نجوم بس الأهلي في دمه .. وفِي ناس كتير بتعشق النادي وممكن أكثر من لاعيبه لعبت”.

واختتم عرابي كلامه قائلًا: ” كابتن مصطفي.. الأهلي للجميع ومفيش حد له حقوق عند النادي ولو انت لعبت أو أنا اشتغلت فأخذنا فلوس واسم وحاجات كتيرة من غير اسم الأهلي ماكنتش حصلت.. ولاد النادي الحقيقيين محدش يعرف عنهم حاجة ومبيتكلموش كتير ولا بيقولوا حاجة وكل واحد فيهم خد اكتر بكتير من اللي ممكن يديه بس هما عارفين الكلام دا ومقدرين جدا وتاريخهم بيقول كدا .. لكن المشكلة في اللي خدوا ومش عارفين الكلام ده ولا فهمينه ولا مقدرينه”.

مصطفى يونس يُعلق على تصريحاته عن أمهات اللاعبين: “مجبتش سيرة الأهلي”