وليد منصور يهاجم مدعي الحزن على وائل المصري: “كنتوا فين لما كان كل شهر تحاليل ودكاترة؟”

كشف المنتج وليد منصور، تفاصيل آخر أيام مدير أعمال نيكول سابا، وائل المصري، بعدما ذهبت روحه إلى بارئها أمس، نتيجة تعرضه لسكتة قلبية. وكتب وليد منصور عبر حسابه الرسمي بموقع التواصل الاجتماعي “فيس بوك”، وقال: “طبعا هزعل يوم أو يومين كمان وخلاص وائل هننسى أنه كان معانا سنين، هننسى أنا بجد كل يوم كنا نصحى نشوف وائل انهاردة هيكتب ايه هيقول ايه علينا ونضحك”. وأضاف: “مع احترامي للجميع ولكل أصحابنا اللي عارفين وائل كويس اللي مصر كلها حزينة عليه، دلوقتي كنتم فين طيب آخر 5 شهور كنتم فين، كان كل شهر من تحاليل وتعب ودكاترة، وبجد وائل المصري نموذج لراجل مصري مكافح فضل يحاول ويحاول ويحاول في مجال بتعنا ده، اللي طول ما أنت راكب فيه أو جامد، مصر كلها تكلمك أول ما تقع فيه أو شغلك يقل وحدة وحدة تتنسي”. وتابع: “مع إن العكس والله المفروض وأنت جامد مش محتاج نفاق أو شغل، أما لما تبقي قلت في شغلك أو تعبت أو وقعت حتي المفروض كلنا ناخد بإيدك وتسعدك، لحد ما تقف تاني على رجلك، مش ننساك أنا أشك أن حد كلم وائل سأله أنت مع عدم إقامة حفلات أو أفراح كل الشهور دي، بتصرف من فين يا وائل أشك أن حد كان فاهم أن تفريغ وائل كل يوم كل همومه على سوشيال ميديا، ده عاوز يطلع اللي جواه بشكل ساخر وعاوز ديما يقول أنا هنا يا جماعة، بس للأسف أحنا مش بنشوف، أنا وائل آخر سنة بذات كنا أقرب أصدقاء لبعض، قالي جماله عمري ما انساها، يا صحبي إحنا ملناش غير بعض كله بيحري ورا الفلوس”.

واستكمل: “ضحكت وقولت يا عم الدراما أنت كله بتحبك سيبك من كلام ده وده، وبدأ يعد من أصحابنا وكل واحد عمل ايه وكل واحد اتغير إزاي، أنا كنت أحاول أدافع عن فلان أو فلان علشان أحاول أفهمه إن أنت بس زعلان شوية، كان رده بكره أفكرك

الدنيا أقسم بالله ما تستاهل كل ده ملعون أبو الفلوس اللي خليتنا ننسى كل حاجة وننسي حتي أصحابنا وننسى حتى أهلنا ونقعد نجري وراها مع أنها مش هتيجي معانا ساعة الحساب وكل ده يروح لغيرنا، صدقوني مكسب الدنيا الوحيد الصاحب اللي بجد الصاحب اللي بيحبك بس بدون أي مصلحة أو أنت راكب وشغال والا أنت قاعد”.

وأردف: “المنافسة في الشغل موجودة، بس هي مش خناقة محدش فينا هياخد غير رزقه والله، ياريت مصر كلها تدعي لوائل وتكون في عزاه انهاردة، ياريت كلنا نفكر إزاي وائل ياخد حظه إن لدينا بعد ما راح لـ اللي أحسن مننا، ياريت كل تكريم يحصل الفترة جاية يكون فيه تكريم لوائل علشان هو بجد من أفضل 3 مدرين أعمال أنا حضرت شغلهم وعمره ما خد حقه”.

واختتم: “ياريت كلنا ندعي لوائل يثبته عند الحساب، أخيرا ياريت نراجع حيتنا وتفكرنا علشان أنا متأكد إننا كلنا غلط ونفهم إن اللي هتخده معاك في الآخرة عملك وحب الناس الحقيقي لك ودعاء أهلك، ربنا يرحم الجميع ويهدي الجميع، هتوحشني يا صاحبي بس طول عمري هفضل أحاول أكون سبب في حاجة تسعدك وأنت عند الأحسن مننا”.